باجوڑ: امن جرگے کو محدود کامیابی، شدت پسندوں کا جزوی انخلا، خطرات برقرار

خار (نمائندہ ڈیلی اردو) خیبرپختونخوا کے ضلع باجوڑ میں شدت پسندوں نے شہری علاقوں سے مشروط انخلا پر آمادگی ظاہر کی ہے، تاہم وہ مکمل طور پر علاقہ چھوڑنے پر تیار نہیں۔ باجوڑ امن جرگے اور شدت پسندوں کے درمیان مذاکرات کا دوسرا دور ہفتے کو تحصیل لوئی ماموند میں اختتام پذیر ہو گیا، جس میں کوئی بڑی پیش رفت نہیں ہو سکی۔

ذرائع کے مطابق، 50 رکنی جرگے نے شدت پسندوں کو دو آپشن دیے تھے: یا تو وہ افغانستان واپس چلے جائیں یا پہاڑی علاقوں کی طرف منتقل ہو جائیں، تاکہ مقامی آبادی محفوظ رہ سکے۔ جمعے کو ہونے والے اجلاس میں شدت پسندوں نے مشاورت کے لیے مہلت مانگی تھی، جبکہ ہفتے کو انہوں نے مکمل انخلا سے انکار کرتے ہوئے صرف پرامن رہنے کی یقین دہانی کرائی۔

اجلاس سہ پہر تین بجے شروع ہو کر شام تک جاری رہا۔ تاہم جرگے کے سربراہ صاحبزادہ ہارون رشید نے اس کی تفصیلات میڈیا سے شیئر نہیں کیں۔ ذرائع کا کہنا ہے کہ ہارون رشید اور جرگہ اراکین نے بعد ازاں اعلیٰ حکام سے ملاقات میں مذاکرات کی صورتحال سے آگاہ کیا اور امید ظاہر کی کہ آئندہ دنوں میں بہتری ممکن ہے۔

ادھر، ممکنہ انسداد دہشت گردی آپریشن اور نقل مکانی کے خدشے کے پیش نظر تحصیل لوئی ماموند کے 16 علاقوں میں فلاحی سرگرمیاں تیز ہو گئی ہیں۔ الخدمت فاؤنڈیشن، جمعیت علمائے اسلام (ف) اور پاکستان ریڈ کریسنٹ سوسائٹی سمیت مختلف تنظیموں نے خار اور دیگر محفوظ علاقوں میں امدادی کیمپ قائم کر دیے ہیں۔

کئی مقامی صاحب حیثیت افراد نے بھی ذاتی حیثیت میں متاثرین کے لیے خوراک اور ضروری اشیا فراہم کرنے کے کیمپ قائم کیے ہیں، تاکہ بے گھر ہونے والے افراد کو فوری مدد دی جا سکے۔