باجوڑ میں سکیورٹی فورسز کا ٹارگٹڈ آپریشن، 13 دیہات کلیئر، 22 میں کارروائیاں جاری

پشاور  (ڈیلی اردو/بی بی سی) پاکستان کے شورش زدہ صوبے خیبر پختونخوا کے قبائلی ضلع باجوڑ کی تحصیل ماموند میں سکیورٹی فورسز نے مسلح عسکریت پسندوں کے خلاف جاری ٹارگٹڈ آپریشن کے دوران مزید پیش رفت کی ہے۔ 

حکام کے مطابق اب تک 13 دیہات کو شدت پسندوں سے کلیئر کروا لیا گیا ہے جبکہ ان دیہات سے نقل مکانی کرنے والے متاثرہ خاندانوں کو واپس گھروں کو روانہ کر دیا گیا ہے۔

ضلعی انتظامیہ کی جانب سے جاری کردہ اعداد و شمار کے مطابق اس وقت تحصیل ماموند کے 22 دیہات میں ٹارگٹڈ آپریشن جاری ہے جہاں عسکریت پسندوں کی موجودگی کی اطلاعات ہیں۔ 

مقامی ذرائع کے مطابق شدت پسندوں کی اصل تعداد کے بارے میں متضاد اطلاعات ہیں، تاہم سرکاری ذرائع کا کہنا ہے کہ ان کی تعداد بہت زیادہ نہیں اور توقع ہے کہ جلد ہی یہ علاقے بھی کلیئر کر دیے جائیں گے۔

حکام کے مطابق باجوڑ کی تحصیل ماموند میں عسکریت پسندوں کے خلاف یہ ٹارگٹڈ کارروائیاں گزشتہ ماہ شروع کی گئی تھیں۔ کارروائی کے آغاز کے وقت سکیورٹی خدشات کے باعث 36 دیہات سے مقامی آبادی کو نقل مکانی کرنا پڑی تھی۔ ان علاقوں سے مجموعی طور پر 22 ہزار 657 خاندان اپنے گھروں کو چھوڑنے پر مجبور ہوئے تھے۔

متاثرہ خاندانوں کے لیے ضلعی انتظامیہ کی جانب سے باجوڑ کے مختلف علاقوں میں اسکولوں اور دیگر سرکاری مقامات پر خیمہ بستیاں قائم کی گئی تھیں جبکہ بڑی تعداد میں لوگوں نے اپنے رشتہ داروں کے گھروں میں پناہ لی تھی۔

انتظامیہ کا کہنا ہے کہ جیسے ہی مزید علاقے شدت پسندوں سے کلیئر ہوتے جائیں گے، وہاں سے نقل مکانی کرنے والے خاندانوں کو بھی واپس بھیجنے کا سلسلہ جاری رکھا جائے گا۔