باوا صدا شاہ کے بیٹے علی رضا نے غریب الیکٹریشن پر معاوضہ طلب کرنے پر پالتو شیر چھوڑ دیا، مقدمہ درج

لاہور (ڈیلی اردو) صوبہ پنجاب کے صوبائی دارالحکومت لاہور کے علاقے شاہدرہ میں امام بارگاہ صدائے امام حسین کے نگراں علی رضا نے غریب الیکٹریشن پر معاوضہ طلب کرنے پر پالتو شیر چھوڑ دیا۔ مزدور شدید زخمی ہوگیا۔ پولیس نے مقدمہ درج کرلیا۔

تفیصلات کے مطابق امام بارگاہ صدائے امام حسین کے نگراں علی رضا کے خلاف اقدام قتل کا مقدمہ درج کرلیا گیا۔ پولیس کا کہنا تھا کہ ’الیکڑیشن گزشتہ ایک ماہ سے اپنے معاوضے کا تقاضہ کررہا تھا‘۔

پولیس کے مطابق محمد رفیق نے بتایا کہ وہ علی رضا کے خلاف شکایت درج کرانے پر اس وقت مجبور ہوا جب مشتبہ ملزم نے وعدہ خلافی کی اور زخموں کا علاج کرانے اور معاوضے کی ادائیگی سے انکار کیا۔

ایف آئی آر کے مطابق علی رضا نے امام بارگاہ شاہدرہ میں کام کرانے کے لیے الیکڑیشن کی خدمات حاصل کیں، کام ختم کرنے کے بعد جب رفیق نے معاوضے کا تقاضہ کیا تو علی رضا نے ادائیگی کے لیے چند روز بعد آنے کا کہا۔

ایف آئی آر نمبر 3255 میں کہا گیا کہ ’نگراں علی رضا نے متعدد مرتبہ رفیق کو بلا کر ادائیگی نہیں کی اور ایک دن جب الیکڑیشن رفیق نے رقم کی ادائیگی کے لیے اصرار کیا تو علی رضا نے پالتو شیر اس پر چھوڑ دیا جس کے نتیجے میں الیکڑیشن رفیق کے چہرے اور بازو پر گہرے زخم آئے‘۔

شکایت کنندہ نے کہا کہ حملے کے دوران مشتبہ ملزم اور اس کے تین ساتھی محض تماشائی بنے رہے اور شیر سے بچانے کے قعطاً کوشش نہیں کی، رفیق نے بتایا کہ اس دوران چیخنے چلانے کی وجہ سے راہ گیر متوجہ ہوئے اور ان کی مداخلت پر شیر کو پیچھے ہٹایا گیا۔ واقعہ کی تصدیق کے بعد پولیس اسٹیشن شاہدرہ لاہور نے علی رضا کے خلاف پاکستان پینل کوڈ دفعہ 324 کے تحت مقدمہ درج کرلیا۔