بلوچستان: اے این پی رہنما عبید اللہ کاسی کے قتل میں ملوث 5 ملزم مبینہ مقابلے میں ہلاک

کوئٹہ (ڈیلی اردو) بلوچستان کے ضلع پشین میں پولیس کی کارروائی کے دوران فائرنگ کے تبادلے میں 5 افراد ہلاک ہوگئے جن کے متعلق پولیس نے دعویٰ کیا ہے کہ یہ افراد عوامی نیشنل پارٹی (اے این پی) کے مقتول رہنما عبید اللہ کاسی کے اغوا اور قتل میں ملوث تھے۔

ترجمان پولیس کے مطابق ملزمان کے قبضے سے اسلحہ اور دستی بم بھی برآمد کیا گیا ہے، ملزمان کی شناخت ہوگئی ہے اور مزید تحقیقات جاری ہیں۔

خیال رہے کہ اے این پی کے رہنما ملک عبیداللہ کاسی کو 26 جون کو کچلاک کے علاقے سے اغوا کیا گیا تھا اور ان کی لاش 5 اگست کو ضلع پشین کے علاقے سرانان سے برآمد ہوئی تھی۔

ملک عبید اللہ کاسی کے قتل کے خلاف عوامی نیشنل پارٹی نے صوبے میں احتجاج اور تین روزہ سوگ کا اعلان کر رکھا ہے۔