بلوچستان: بولان میں جعفر ایکسپریس ٹرین کے قریب دھماکہ، 8 افراد زخمی

کوئٹہ (ڈیلی اردو) بلوچستان کے ضلع بولان کے علاقے پنیر میں ریلوے ٹریک کے قریب دھماکا ہوا جس کے نتیجے میں انجن سمیت 6 بوگیاں پٹری سے اتر گئیں، جس کے سبب 8 افراد زخمی ہوگئے۔

https://twitter.com/ShabbirTuri/status/1616395503263948802?t=uGr3KUpE2i0pWDV77JabOA&s=19

ترجمان پاکستان ریلوے محمد کاشف کے مطابق بولان کے علاقے پنیر ریلوے اسٹیشن پر واقع پٹری کے قریب زور دار دھماکا ہوا جس کے نتیجے میں مچھ سے پشاور جانے والی جعفر ایکسپریس کے انجن سمیت 6 بوگیاں پٹری سے اتر گئی۔

ریسکیو حکام کے مطابق بوگیاں اتر جانے سے 8 افراد زخمی ہوئے جنہیں ہسپتال منتقل کیا گیا۔

رپورٹ کے مطابق ضلعی انتظامیہ کی جانب سے ہسپتالوں میں ایمرجنسی نافذ کردی گئی ہے، ریلوے حکام نے امدادی ٹیمیں کوئٹہ سے روانہ کردی ہیں جبکہ سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے۔

ڈپٹی کمشنر (ڈی سی) کچھی آغا سمیع اللہ نے ڈان نیوز ڈاٹ ٹی وی کو واقعے کی تصدیق کرتے ہوئے کہا کہ ریلوے ٹریک پر دھماکا ریمورٹ کنٹرول ڈیوائس سے کیا گیا، جس کی وجہ سے ٹرین کی متعدد بوگیاں پٹری سے اتر گئیں۔

ڈی سے نے بتایا کہ دھماکے کے بعد ضلع کے ہسپتالوں میں ایمرجنسی نافذ کردی ہے اور ریسکیو کی ٹیمیں دھماکے کی جگہ روانہ کردی گئیں۔

پولیس نے اب تک واقعے کے حوالے سے کوئی بیان جاری نہیں کیا ہے۔

دوسری جانب کالعدم تنظیم بلوچ لبریشن آرمی نے جعفر ایکسپریس پر بم حملے کی ذمہ داری قبول کرلی۔

ترجمان آزاد بلوچ نے دعویٰ کیا ہے کہ سرمچاروں کے حملے میں ایف سی اور فوج کے 10 اہلکار ہلاک اور 25 سے زائد زخمی ہوگئے۔

واضح رہے کہ 25 دسمبر کو بلوچستان کے علاقےکاہان میں دہشت گردوں کے خلاف جاری ’کلیئرنس آپریشن‘ کے دوران آئی ای ڈی دھماکے میں پاک فوج کے ایک افسر سمیت 6 اہلکار ہلاک ہوگئے تھے جبکہ مختلف علاقوں میں دستی بم دھماکوں میں کم از کم 15 افراد زخمی ہوگئے تھے۔

آئی ایس پی آر نے بتایا تھا کہ آپریشن کے دوران کارروائی میں مصروف ٹیم کے قریب آئی ای ڈی دھماکا ہوا جس کے نتیجے میں کیپٹن فہد سمیت مادر وطن کے 6 فوجی ہلاک ہوگئے۔