بلوچستان: بولان کے علاقے دھاڈر میں گاڑی پر فائرنگ، 3 افراد ہلاک، 2 شدید زخمی

کوئٹہ (ڈیلی اردو) بلوچستان کے ضلع بولان کے علاقے دھاڈر میں نامعلوم افراد کی فائرنگ سے تین افراد جاں بحق جبکہ دو شدید زخمی ہوگئے۔

لیویز حکام کے مطابق دھاڈر میں بالا ناڑی کے قریب قومی شاہراہ پر نامعلوم افراد نے گاڑی پر اندھا دھند فائرنگ کی، جس کے نتیجے میں تین افراد موقع پر دم توڑ گئے۔

حکام کے مطابق فائرنگ کے واقعے میں دو افراد شدید زخمی ہوئے جنہیں تشویشناک حالت میں ہسپتال منتقل کردیا گیا ہے۔

پولیس اور لیویز حکام نے واقعے کے بعد علاقے کو گھیرے میں لے کر شواہد جمع کرلیے جبکہ شرپسندوں کی گرفتاری کیلیے داخلی اور خارجی راستوں پر ناکہ بندی سخت کردی۔

ہسپتال میں ضابطے کی کارروائی کے بعد مقتولین کی شناخت کا عمل جاری ہے۔

ترجمان کے مطابق شناخت کے بعد لاشوں کو لواحقین کے حوالے کیا جائے گا۔