بلوچستان: خضدار سے تین افراد کی گولیوں سے چھلنی لاشیں برآمد

کوئٹہ (ڈیلی اردو) بلوچستان کے ضلع خضدار میں ایک بار پھر پُراسرار تشدد کا واقعہ سامنے آیا ہے، جہاں ایم ایٹ شاہراہ پر سورگز کے مقام سے تین افراد کی گولیوں سے چھلنی لاشیں برآمد ہوئی ہیں۔

پولیس کے مطابق، مقتولین کی شناخت عبدالمجید، عطاالرحمٰن اور ممتاز کے نام سے ہوئی ہے، جنہیں فائرنگ کر کے قتل کیا گیا۔ لاشوں کو ریسکیو کے ذریعے قریبی اسپتال منتقل کر دیا گیا ہے، جبکہ واقعے کی تفتیش کا آغاز کر دیا گیا ہے۔

یہ واقعہ ایسے وقت پر پیش آیا ہے جب صوبے میں پہلے ہی پُرتشدد واقعات اور ٹارگٹ کلنگ کے واقعات میں اضافہ دیکھنے میں آ رہا ہے۔

یاد رہے کہ اپریل 2025 میں بھی ضلع زیارت کے علاقے گونجا تنگی سے سات افراد کی گولیوں سے چھلنی لاشیں ملی تھیں۔ اس واقعے کے بعد مقامی آبادی نے چوتیر کے مقام پر شدید احتجاج کرتے ہوئے شاہراہ کو بند کر دیا تھا۔ مظاہرین کا کہنا تھا کہ مارے گئے افراد کا تعلق ان کے علاقے سے نہیں اور اگر وہ دہشت گرد تھے تو پہلے کبھی علاقے میں دیکھے کیوں نہیں گئے؟

شہریوں کو خدشہ تھا کہ اس واقعے کو جواز بنا کر ان کے علاقے میں سیکیورٹی آپریشن نہ شروع کر دیا جائے۔

بلوچستان میں اس نوعیت کے واقعات نہ صرف امن و امان کے بگڑتے حالات کی عکاسی کرتے ہیں بلکہ مقامی آبادی اور ریاستی اداروں کے درمیان بڑھتے ہوئے اعتماد کے فقدان کو بھی نمایاں کرتے ہیں۔

مزید تحقیقات جاری ہیں، تاہم اب تک کسی گروہ نے ان واقعات کی ذمہ داری قبول نہیں کی ہے۔