بلوچستان: زیارت ریزیڈنسی حملے میں ملوث بی ایل اے کمانڈر سمیت 3 دہشت گرد گرفتار

کوئٹہ (مانیٹرنگ ڈیسک) کاؤنٹر ٹیررازم ڈیپارٹمنٹ (سی ٹی ڈی ) نے صوبہ بلوچستان کے ضلع زیارت میں واقع قائد ریزیڈنسی دہشت گردی واقعہ میں ملوث کالعدم تنظیم بلوچ لبریشن آرمی کا انتہائی مطلوب دہشت گرد کو گرفتار کرلیا ہے۔

کاؤنٹر ٹیررازم ڈیپارٹمنٹ کے ترجمان نے بتایا کہ بلوچستان کے علاقے ہرنائی میں سی ٹی ڈی کی ایک کارروائی میں بانئ پاکستان قائداعظم محمد علی جناح کی رہائش گاہ (زیارت ریزیڈنسی) پر حملے میں ملوث مبینہ دہشت گرد سمیت 3 ملزمان کو گرفتار کر لیا گیا۔

سی ٹی ڈی کے مطابق مبینہ دہشت گردوں کے قبضے سے اسلحہ و گولہ بارود برآمد کیا گیا، مبینہ دہشت گرد حساس تنصیبات پر حملے کی منصوبہ بندی کر رہے تھے۔

واضح رہے کہ 15 جون 2013 کو کچھ دہشت گردوں نے قائد اعظم ریزیڈنسی پر حملہ کیا تھا، اس حملے میں 4 سیکیورٹی پر مامور گارڈ جان سے ہاتھ دھو بیٹھے تھے اور ریزیڈنسی کی عمارت بھی آگ میں جل گئی تھی۔

جون 2015 میں کوئٹہ میں انسداد دہشت گردی عدالت نے زیارت ریزیڈنسی حملہ کیس میں بلوچ قوم پرست رہنما نواب زادہ حیر بیار مری سمیت 33 ملزمان پر فرد جرم عائد کی تھی۔

اس وقت کے ایس ایس پی آپریشنز اعتزاز احمد گورایا نے بتایا تھا کہ اس دہشت گرد حملے میں کُل 12 حملہ آوروں نے حصہ لیا تھا۔

زیارت زیزیڈنسی کی دوبارہ تعمیر

سال 2013 میں 15 جون کو مسلح دہشت گردوں نے بلوچستان کے علاقے زیارت میں قائداعظم ریذیڈنسی پر حملہ کرکے قائداعظم کی آخری آرام گاہ کو تباہ کردیا تھا، جس کے بعد حکومت اور فوج کے تعاون سے زیارت ریزیڈنسی کی دوبارہ تعمیر نو کا اعلان کیا گیا اور سال 2014 میں 14 اگست کے موقع پر اس کی تعمیر نو مکمل ہونے پر اس کا افتتاح کیا گیا۔