بلوچستان: سبی میں سیکورٹی فورسز کا آپریشن، بلوچ نیشنل آرمی کے چھ دہشت گرد ہلاک

راولپنڈی (ڈیلی اردو) صوبہ بلوچستان کے ضلع سبی میں سیکیورٹی فورسز نے دہشت گردوں کے خلاف کارروائی کر کے 6 دہشت گردوں کو ہلاک کردیا جبکہ فائرنگ کے تبادلے میں ایک سپاہی ہلاک اور دو زخمی ہوگئے۔

پاکستانی فوج کے شعبہ تعلقات عامہ (آئی ایس پی آر) سے جاری بیان میں کہا گیا کہ سیکیورٹی فورسز نے بلوچستان کے شہر سبی کے قریب نگاؤ پہاڑوں کے عام علاقے میں دہشت گردوں کی موجودگی کی اطلاع پر ان کی گرفتاری کے لیے کارروائی کی۔

بیان میں کہا گیا کہ جب جوانوں نے علاقے میں کلیئرنس آپریشن شروع کیا تو دہشت گردوں نے ٹھکانوں سے فرار ہونے کی کوشش کی اور سکیورٹی فورسز پر فائرنگ شروع کردی۔

آئی ایس پی آر نے بتایا کہ فائرنگ کے تبادلے کے دوران بلوچ نیشنل آرمی (بی این اے) کے نصیب اللہ بنگلزئی عرف جہانگیر، پیر جان اور راکائی کلہوئی سمیت 6 دہشت گرد ہلاک ہوگئے۔

بیان میں کہا گیا کہ ہلاک دہشت گرد سبی اور اطراف میں سیکیورٹی فورسز پر حالیہ حملوں میں ملوث تھے اور 20 جنوری کو لاہور کے علاقے انارکلی میں ہونے والے بم دھماکے میں بھی ملوث تھے۔

خیال رہے کہ لاہور کے مشہور انار کلی بازار میں بم دھماکے کے نتیجے میں 3 افراد ہلاک اور 22 زخمی ہوگئے تھے۔

کارروائی کی تفصیلات سے متعلق آئی ایس پی آر نے مزید بتایا کہ اسلحہ اور بارود بھی برآمد کیا گیا جو دہشت گردوں کی جانب سے علاقے میں امن میں خلل ڈالنے کے لیے استعمال کرنی کی نیت سے رکھا گیا تھا۔

آئی ایس پی آر نے کہا کہ کارروائی کے دوران پاکستانی فوج کا سپاہی نثار ہلاک جبکہ دو جوان زخمی ہوئے۔

بیان کے مطابق سیکیورٹی فورسز بلوچستان میں امن، استحکام اور ترقی کو سبوتاژ کرنے کی کوششوں کو ختم کرنے کے لیے پرعزم ہے۔

واضح رہے کہ 15 مارچ کو بلوچستان کے علاقے سبی میں سڑک کنارے نصب آئی ای ڈی بم دھماکے میں ایف سی کے 4 اہلکار ہلاک اور 8 زخمی ہو گئے تھے۔

مقامی انتظامیہ نے بتایا تھا کہ دھماکا سبی کے علاقے سانگان میں ہوا جس میں ایف سی کے 4 اہلکار ہلاک اور 8 اہلکار زخمی ہوئے۔

اسسٹنٹ کمشنر نے تصدیق کرتے ہوئے کہا تھا کہ دھماکے میں زخمی 8 اہلکاروں میں سے 6 کی حالت نازک ہے اور سی ایم ایچ سبی میں ان کا علاج جاری ہے۔

اس سے قبل 9 مارچ کو تربت میں سیکیورٹی فورسز کے انٹیلی جنس آپریشن میں 2 کمانڈروں سمیت 7 دہشت گرد ہلاک ہو گئے تھے۔

آئی ایس پی آر نے کہا تھا کہ سیکیورٹی فورسز نے تربت کے علاقے گورچوپ میں دہشت گردوں کی ٹھکانے میں موجودگی کی خفیہ اطلاع پر آپریشن کیا جس میں فائرنگ کا تبادلہ ہوا اور دو کمانڈروں حاصل ڈوڈا اور واشدل سمیت 7 دہشت گرد مارے گئے۔

بیان میں کہا گیا تھا کہ ہلاک دہشت گرد مکران ڈویژن میں حالیہ فائرنگ اور سیکیورٹی فورسز پر حملوں میں ملوث تھے، ہلاک دہشت گردوں سے اسلحہ اور گولہ بارود کا اہم ذخیرہ بھی برآمد کر لیا گیا۔