بلوچستان: نوشکی میں دھماکا، میجر رضوان سمیت 3 اہلکار ہلاک، 3 زخمی

واشنگٹن (ش ح ط) پاکستان کے شورش زدہ صوبے بلوچستان کے ضلع نوشکی میں سیکیورٹی فورسز کی گاڑی کو مبینہ طور پر بلوچ علیحدگی پسندوں نے ریموٹ کنٹرول بم سے نشانہ بنایا، جس کے نتیجے میں ایک میجر سمیت تین اہلکار ہلاک اور تین زخمی ہو گئے۔

سرکاری ذرائع کے مطابق، یہ واقعہ منگل کی شب تقریباً 8 بجے نوشکی کے علاقے کردگاپ میں اس وقت پیش آیا جب سیکیورٹی فورسز کا قافلہ معمول کے گشت پر تھا۔ قافلے میں شامل ایک گاڑی کو دھماکے سے اڑا دیا گیا، جس کے نتیجے میں میجر رضوان، نائیک امین اور لانس نائیک یونس موقع پر ہی ہلاک ہو گئے، جبکہ سپاہی حسن، سپاہی حامد اور لانس نائیک فضل شدید زخمی ہوئے۔

ذرائع کا کہنا ہے کہ دھماکے کے نتیجے میں گاڑی مکمل طور پر تباہ ہو گئی، جبکہ ہلاکتوں میں اضافے کا خدشہ ظاہر کیا جا رہا ہے۔

دھماکے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ اگرچہ تاحال کسی گروہ نے اس حملے کی ذمہ داری باضابطہ طور پر قبول نہیں کی، تاہم حکام کو شبہ ہے کہ اس کارروائی میں بلوچ علیحدگی پسند گروہ ملوث ہو سکتے ہیں۔

یاد رہے کہ بلوچستان میں حالیہ ہفتوں کے دوران سیکیورٹی فورسز پر حملوں میں نمایاں اضافہ ہوا ہے، جن میں چار میجر رینک کے افسران میجر رب نواز، میجر انور کاکڑ، میجر ضیاء سلیم اور اب میجر رضوان ہلاک ہو چکے ہیں۔ ان حملوں کی ذمہ داری ماضی میں مختلف بلوچ مزاحمتی تنظیمیں قبول کرتی رہی ہیں۔