بلوچستان: پنجگور میں اعلیٰ تعلیم یافتہ مبینہ دہشت گرد گرفتار، مزید نوجوان بھی زیر حراست

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے ضلع پنجگور میں قانون نافذ کرنے والے اداروں کے ایک اہم آپریشن کے دوران اعلیٰ تعلیم یافتہ مبینہ دہشت گرد ساجد احمد کو گرفتار کر لیا گیا ہے۔ ڈی آئی جی سی ٹی ڈی اعزاز گورایہ کے مطابق ساجد احمد اسلامی یونیورسٹی اسلام آباد سے فارغ التحصیل ہے اور تربت سے پنجگور تک بھاری مقدار میں اسلحہ منتقل کر رہا تھا۔

پریس کانفرنس کے دوران ایڈیشنل چیف سیکریٹری داخلہ حمزہ شفقات نے بتایا کہ ساجد احمد سوشل میڈیا پر کالعدم تنظیموں کا مواد نشر کرنے اور بچوں کو دہشت گردانہ سرگرمیوں کی طرف راغب کرنے میں مرکزی کردار ادا کر رہا تھا۔ اس سلسلے میں حال ہی میں 3 دیگر نوجوان بھی گرفتار کیے گئے ہیں۔

ڈی آئی جی سی ٹی ڈی نے مزید بتایا کہ اس کارروائی میں ایک اور دہشت گرد جہانزیب مہربان کو گرفتار کیا گیا، جو ریکی اور مالی معاونت میں ملوث تھا۔ جہانزیب نے ایک 18 سالہ نوجوان کو بھی اپنے ساتھ شامل کیا تھا۔

ساجد احمد یونیورسٹی آف تربت میں تدریس کر چکا ہے، اور اس کی بھابھی بھی بی وائی سی کی کارروائیوں میں ملوث رہی۔ مزید کارروائیوں میں دہشت گرد بیزل اور خاران کے رہائشی سرفراز کو بھی گرفتار کیا گیا۔

ایڈیشنل چیف سیکریٹری داخلہ نے کہا کہ پورے صوبے میں پولیس کی مضبوط عملداری موجود ہے اور ہر ضلع میں دہشت گردی کے خاتمے کے لیے ادارے کی شاخیں قائم کی جا رہی ہیں۔ انہوں نے مزید بتایا کہ گزشتہ تین ماہ میں دہشت گردی کے متعدد واقعات میں کارروائیاں کی گئی ہیں۔