بلوچستان: پیپلز پارٹی اور ن لیگ رہنماؤں کے گھروں پر دستی بم حملہ، 7 محافظ زخمی

کوئٹہ (ڈیلی اردو) پاکستان کے شورش زدہ صوبے بلوچستان کے ضلع خضدار کے علاقے دو تلوار میں پاکستان پیپلز پارٹی کے سینئر رہنما آغا شکیل احمد درانی اور مسلم لیگ (ن) کے سینیٹر آغا شازیب درانی کی رہائش گاہ پر نامعلوم افراد نے دستی بم سے حملہ کر دیا، جس کے نتیجے میں 7 محافظ زخمی ہو گئے۔

سینئر سپرنٹنڈنٹ آف پولیس (ایس ایس پی) خضدار شہزادہ عمر عباس بابر نے مقامی صحافیوں کو بتایا کہ حملے کے وقت گھر پر تعینات سیکیورٹی اہلکاروں میں سے سات افراد معمولی زخمی ہوئے، جنہیں فوری طبی امداد کے لیے خضدار ٹیچنگ ہسپتال منتقل کر دیا گیا۔ ایس ایس پی نے بتایا کہ زخمیوں کی حالت خطرے سے باہر ہے۔

انہوں نے مزید کہا کہ دھماکے کے بعد پولیس اور دیگر سیکیورٹی فورسز نے علاقے کو گھیرے میں لے کر حملہ آوروں کی تلاش شروع کر دی ہے۔ ایس ایس پی نے کہا کہ جائے وقوع سے شواہد اکٹھے کیے جا رہے ہیں اور جلد ملزمان کو قانون کے کٹہرے میں لایا جائے گا۔

دریں اثنا، وزیراعلیٰ بلوچستان میر سرفراز بگٹی نے خضدار میں ہونے والے اس دستی بم حملے کو افسوسناک قرار دیا اور کہا کہ ایسے بزدلانہ واقعات عوام اور قیادت کے حوصلے پست نہیں کر سکتے۔ انہوں نے زخمیوں کی جلد صحتیابی کے لیے دعائیں کیں اور یقین دلایا کہ واقعے کی فوری تحقیقات شروع کر دی گئی ہیں، اور ملزمان کو جلد انصاف کے کٹہرے میں لایا جائے گا۔