بلوچستان: ڈیرہ بگٹی سے نو چرواہے اغوا

کوئٹہ (ڈیلی اردو) پاکستان کے شورش زدہ صوبے بلوچستان کے ضلع ڈیرہ بگٹی کی تحصیل سوئی میں نو افراد کو اغوا کر لیا گیا ہے۔ 

لیویز حکام کے مطابق یہ واقعہ تحصیل سوئی کے علاقے گوٹھان میں پیش آیا، جہاں بلوچ عسکریت پسندوں نے لوگوں کو اسلحے کے زور پر یرغمال بنایا اور کم از کم نو افراد کو نامعلوم مقام پر منتقل کر دیا۔

حکام نے بتایا کہ اغوا شدگان بگٹی قبیلے کی ہجوّانی شاخ سے تعلق رکھتے ہیں اور مویشی چرانے کا کام کرتے تھے۔ اس واردات کے بعد علاقے میں خوف و ہراس پھیل گیا ہے۔

لیویز اور دیگر سیکیورٹی اہلکاروں نے اطلاع ملتے ہی فوری طور پر علاقے کا محاصرہ کر کے سرچ آپریشن شروع کر دیا۔ 

مقامی ذرائع کے مطابق اغوا شدہ افراد کو تلاش کرنے اور ان کی بحفاظت بازیابی کو یقینی بنانے کے لیے بھرپور کارروائیاں جاری ہیں۔