بلوچستان: ژوب میں سیکیورٹی فورسز کا کلیئرنس آپریشن، مزید 14 دہشت گرد ہلاک

اسلام آباد (ک م ) پاکستانی فوج کے شعبہ تعلقات عامہ (آئی ایس پی آر) کے مطابق 8 اور 9 اگست کی شب پاک-افغان سرحد کے قریب سمبازہ میں دہشت گردوں کی ہلاکت کے بعد کلیئرنس آپریشن کیا گیا، اس دوران بھارتی سرپرستی میں سرگرم مزید 14 خوارج ٹریس کر کے ہلاک کردیے گئے۔

آئی ایس پی آر کی جانب سے آگاہ کیا گیا ہے کہ کلیئرنس آپریشن میں ہلاک ہونے والے خوارج سے اسلحہ، گولا بارود اور دھماکا خیز مواد بھی برآمد ہوا، 2 روزہ آپریشن میں ہلاک خوارج کی مجموعی تعداد بڑھ کر 47 ہو گئی۔

بیان میں کہا گیا کہ پاک فوج اور دیگر سیکیورٹی ادارے پاک سرزمین کو دہشت گردوں کے ناپاک وجود سے محفوظ رکھنے کے لیے پر عزم ہیں

ادھر پاکستان کے وفاقی وزیر داخلہ محسن نقوی نے دعویٰ کیا ہے کہ سکیورٹی فورسز نے افغانستان کی سرحد کے قریب بلوچستان کے علاقے سمبازہ میں ایک ’کامیاب آپریشن‘ کے دوران 14 شدت پسندوں کو ہلاک کیا ہے، جنہیں ان کے بقول ’انڈین سپانسرڈ‘ تھا۔

ان کا کہنا تھا کہ اس کارروائی سے ’بلوچستان میں امن کو سبوتاژ کرنے کی گھناؤنی سازش ناکام بنا دی گئی۔‘ واضح رہے کہ بھارت ماضی میں اس نوعیت کے الزامات کی تردید کرتا رہا ہے۔

آئی ایس پی آر کے مطابق یہ آپریشن دو روز تک جاری رہا، جس میں مجموعی طور پر 47 شدت پسند ہلاک کیے گئے۔ فورسز نے علاقے سے دھماکہ خیز مواد اور اسلحہ بھی برآمد کیا۔ فوج کے مطابق یہ کارروائی پاکستان اور افغانستان کی سرحد کے قریب واقع پاکستانی علاقے میں کی گئی، جہاں شدت پسندوں کو ڈھونڈ کر نشانہ بنایا گیا۔