بلوچستان: کوئٹہ میں ایف سی ہیڈ کوارٹرز کے باہر خودکش کار بم دھماکا، 10 افراد ہلاک، 35 زخمی

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے دارالحکومت کوئٹہ میں نیم فوجی سکیورٹی فورس فرنٹیئر کانسٹیبلری (ایف سی) کے ہیڈکوارٹرز کے باہر ایک کار بم دھماکے اور فائرنگ کے نتیجے میں کم از کم 10 افراد ہلاک جبکہ درجنوں دیگر زخمی ہو گئے۔

پولیس کے مطابق دھماکے سے قبل کار میں سوار چار حملہ آور باہر نکلے اور انہوں نے سکیورٹی اہلکاروں پر فائرنگ کی، جس کا جواب سکیورٹی فورسز نے بھی دیا۔ دھماکے کی شدت اتنی زیادہ تھی کہ اس کی آواز میلوں دور تک سنی گئی اور آس پاس کی عمارتوں کے شیشے ٹوٹ گئے، قریبی گاڑیوں اور رکشوں کو بھی نقصان پہنچا۔ زخمیوں اور ہلاک شدگان کی لاشیں فوری طور پر قریبی ہسپتال منتقل کر دی گئیں۔

صوبائی وزیر صحت بخت کاکڑ نے کہا کہ ہلاکتوں کی تعداد میں مزید اضافہ ہو سکتا ہے۔

دھماکے کی سی سی ٹی وی فوٹیج اور مقامی ٹی وی چینلز کی تصاویر میں دکھایا گیا کہ کار ایف سی ہیڈکوارٹر کے گیٹ کے سامنے رکتی ہے، جس کے بعد ایک زوردار دھماکہ اور پھر فائرنگ کی آوازیں سنائی دیتی ہیں۔

بلوچستان کے وزیر اعلیٰ سرفراز بگٹی نے حملے کی شدید مذمت کرتے ہوئے کہا: “دہشت گرد بزدلانہ کارروائیوں کے ذریعے قوم کے عزم کو نہیں توڑ سکتے۔ ہماری حکومت صوبے کو پرامن اور محفوظ بنانے کے لیے پرعزم ہے۔”

حملہ ایسے وقت پر ہوا ہے جب چند ہفتے قبل کوئٹہ کے قریب ایک خودکش حملہ میں کم از کم 13 افراد ہلاک اور 35 زخمی ہوئے تھے۔ بلوچستان میں مسلح علیحدگی پسند گروہ، بشمول کالعدم بلوچ لبریشن آرمی، صوبائی آزادی اور معدنی ذخائر کے استحصال کے خلاف کارروائیاں کرتے ہیں۔

سرکاری حکام کے مطابق سکیورٹی حصار مضبوط ہونے کی وجہ سے حملہ آور ہیڈکوارٹر میں داخل ہونے میں ناکام رہے۔ پہلا خودکش حملہ آور سوزوکی گاڑی میں بارود لے کر ایف سی ہیڈکوارٹر کے قریب پھٹ گیا، جبکہ دیگر حملہ آوروں کی کوشش ناکام رہی۔

یہ حملہ اپنی نوعیت کا سب سے بڑا واقعہ ہے، اگرچہ اس سے قبل 2013 میں بھی گورنر ہاؤس کوئٹہ کے نزدیک انسپیکٹر جنرل پولیس کی رہائش اور دیگر سرکاری دفاتر پر حملے ہو چکے ہیں۔