بنوں میں انٹیلی جنس بیسڈ آپریشنز، ٹی ٹی پی کے 6 دہشتگرد ہلاک

بنوں(ڈیلی اردو) خیبرپختونخواہ کے شورش زدہ ضلع بنوں میں سیکیورٹی فورسز نے گزشتہ ایک ہفتے کے دوران مختلف انٹیلی جنس بیسڈ آپریشنز میں کالعدم تحریک طالبان پاکستان (ٹی ٹی پی) کے 6 مبینہ دہشتگردوں کو ہلاک کر دیا۔

سیکیورٹی ذرائع کے مطابق بنوں کے مختلف علاقوں میں دہشتگردوں کی موجودگی اور نقل و حرکت سے متعلق انٹیلی جنس اطلاعات موصول ہونے کے بعد الگ الگ کارروائیاں کی گئیں۔ ان کارروائیوں کے دوران 6 دہشتگرد ہلاک ہوئے۔

ذرائع کا کہنا ہے کہ سیکیورٹی فورسز نے بنوں میں نگرانی کا عمل مزید سخت کر دیا ہے اور دہشتگردوں کے ممکنہ ٹھکانوں، آمدورفت کے راستوں اور سہولت کاری کے نیٹ ورک پر نظر رکھی جا رہی ہے، تاکہ کسی بھی ممکنہ حملے سے قبل ان عناصر کے خلاف کارروائی کی جا سکے۔

بنوں میں سیکیورٹی فورسز کا ایک بڑا آپریشن بھی جاری ہے، جس کے دوران مشتبہ مقامات اور ان کے اطراف میں سرچ آپریشن کیا جا رہا ہے۔ ذرائع کے مطابق علاقے کو گھیرے میں لے کر باقی دہشتگردوں کی تلاش اور فرار کی ممکنہ کوششوں کو ناکام بنانے کے لیے کارروائیاں جاری ہیں۔

بنوں خیبر پختونخوا کے ان علاقوں میں شامل ہے جہاں سیکیورٹی تنصیبات، قانون نافذ کرنے والے اداروں اور شہریوں کو نشانہ بنانے کی کوششوں کے باعث انسدادِ دہشتگردی کی کارروائیاں جاری رہتی ہیں۔ سیکیورٹی اداروں کی جانب سے انٹیلی جنس کی بنیاد پر کارروائیوں کے ذریعے دہشتگرد نیٹ ورکس کی نشاندہی اور انہیں غیر مؤثر بنانے پر توجہ دی جا رہی ہے۔

سیکیورٹی ذرائع کے مطابق جاری آپریشن مکمل ہونے کے بعد ہلاک ہونے والے دہشتگردوں کی شناخت، اسلحے یا دیگر سامان کی برآمدگی اور کارروائی سے متعلق مزید تفصیلات سامنے آنے کا امکان ہے۔