بلوچستان: کوئٹہ میں پولیس وین پر دستی بم حملہ، ایس ایچ او سمیت 9 افراد زخمی

کوئٹہ (ڈیلی اردو رپورٹ) صوبہ بلوچستان کے دارالحکومت کوئٹہ میں مشرقی بائی پاس کے قریب پولیس وین پر دستی بم حملے کے نتیجے میں ایس ایچ او اور 2 بچیوں سمیت 9 افراد زخمی ہو گئے۔

پولیس کے مطابق واقعہ سوموار کے روز کوئٹہ کے علاقے مشرقی بائی پاس بکرا منڈی کے قریب اس وقت پیش آیا جب تھانہ منظور شہید کے ایس ایچ او نور اللہ اور دیگر عملہ ڈیوٹی پر مامور تھا۔ اسی دوران نامعلوم موٹر سائیکل سوار حملہ آوروں نے پولیس وین پر دستی بم پھینکا جو زور دار دھماکے سے پھٹ گیا۔

دھماکے کے نتیجے میں ایس ایچ او نور اللہ، ایڈیشنل ایس ایچ او کامران اور 2 بچیوں سمیت 9 افراد زخمی ہو گئے، جنہیں فوری طور پر سول ہسپتال منتقل کر دیا گیا۔

دھماکے کے بعد پولیس اور دیگر قانون نافذ کرنے والے اداروں نے علاقے کو گھیرے میں لے کر شواہد اکٹھے کیے اور تحقیقات کا آغاز کر دیا۔

پولیس ذرائع کے مطابق گزشتہ 24 گھنٹوں کے دوران کوئٹہ میں بم دھماکے کا یہ تیسرا واقعہ ہے، جس میں ایک شخص ہلاک جبکہ مجموعی طور پر 14 افراد زخمی ہوئے ہیں۔