بلوچستان: کیچ میں فوجی کانوائے پر خودکش دھماکا، 12اہلکار ہلاک، 28 شدید زخمی

واشنگٹن (ش ح ط) پاکستان کے شورش زدہ صوبے بلوچستان کے ضلع کیچ میں قومی شاہراہ ایم-8 پر سیکیورٹی فورسز کے قافلے پر خودکش حملے میں کم از کم 12 اہلکار ہلاک جبکہ 28 سے زائد زخمی ہوگئے۔

سیکیورٹی ذرائع کے مطابق یہ واقعہ جمعرات کو دشت کے علاقے میں کنچتی کراس کے قریب پیش آیا، جو تربت شہر سے تقریباً 60 کلومیٹر دور ہے۔ 

اطلاعات کے مطابق ایک خودکش بمبار نے دھماکہ خیز مواد سے بھری گاڑی فرنٹیئر کور کی بسوں کے قافلے سے ٹکرا دی۔

زخمیوں اور لاشوں کو ہیلی کاپٹروں کے ذریعے سی ایم ایچ کوئٹہ منتقل کیا گیا، جہاں متعدد اہلکاروں کی حالت تشویشناک بتائی جاتی ہے۔

سرکاری ذرائع کے مطابق علاقے میں سرچ آپریشن جاری ہے۔

حملے کی ذمہ داری کالعدم بلوچ عسکریت پسند تنظیم بلوچ لبریشن آرمی (بی ایل اے) کی فدائی یونٹ مجید بریگیڈ نے قبول کرلی ہے۔ بی ایل اے کے ترجمان جیئند بلوچ نے میڈیا کو جاری بیان میں دعویٰ کیا کہ ان کی تنظیم نے سی پیک روٹ پر سیکیورٹی فورسز کے قافلے کو نشانہ بنایا۔

پاکستانی فوج نے فوری طور پر اس واقعے پر کوئی تبصرہ نہیں کیا ہے اور اس کی طرف سے بعد میں ایک بیان جاری کرنے کی توقع ہے۔

خیال رہے کہ پاکستان نے بی ایل اے کو دہشت گرد تنظیم قرار دے رکھا ہے۔ چین اور برطانیہ بھی اسے دہشت گرد تنظیم قرار دیتے ہیں۔

10 اگست 2025 کو امریکی محکمہ خارجہ نے بلوچ لبریشن آرمی (بی ایل اے) کے ذیلی گروپ مجید بریگیڈ کو غیر ملکی دہشت گرد تنظیم قرار دے دیا۔ 

امریکی محکمہ خارجہ کے مطابق مجید بریگیڈ کو بی ایل اے کے پہلے سے موجود "خصوصی طور پر نامزد عالمی دہشت گرد" (SDGT) درجے میں بھی شامل کر دیا گیا ہے۔

بلوچ لبریشن آرمی کو 2019 میں متعدد دہشت گرد حملوں کے بعد ایس ڈی جی ٹی قرار دیا گیا تھا۔ اس کے بعد بھی بی ایل اے نے کئی حملوں کی ذمہ داری قبول کی، جن میں مجید بریگیڈ کے حملے بھی شامل تھے۔

2024 میں بی ایل اے نے کراچی ایئرپورٹ کے قریب اور گوادر پورٹ اتھارٹی کمپلیکس میں خودکش حملوں کی ذمہ داری قبول کی۔ 2025 میں اس گروپ نے جعفر ایکسپریس کی ہائی جیکنگ کی ذمہ داری بھی قبول کی، جس میں 31 شہری اور سیکیورٹی اہلکار ہلاک ہوئے جبکہ 300 سے زائد مسافروں کو یرغمال بنایا گیا۔

امریکی محکمہ خارجہ نے کہا کہ یہ اقدام ٹرمپ انتظامیہ کے دہشت گردی کے خلاف عزم کو ظاہر کرتا ہے۔ دہشت گرد قرار دینا دہشت گرد سرگرمیوں کی معاونت روکنے کا ایک مؤثر طریقہ ہے۔