بلوچستان کے مستونگ میں جعفر ایکسپریس پر دھماکہ، متعدد بوگیاں پٹڑی سے اتر گئیں

کوئٹہ (ڈیلی اردو) پاکستان کے شورش زدہ صوبے بلوچستان کے ضلع مستونگ کے نواحی علاقے اسپیزنٹ میں ریلوے ٹریک پر دھماکے کے نتیجے میں پشاور سے کوئٹہ جا رہی جعفر ایکسپریس کی 6 بوگیاں پٹڑی سے اتر گئیں، جبکہ اس حادثے میں کئی افراد زخمی ہو گئے۔ 

محکمہ صحت بلوچستان اور سول ہسپتال کوئٹہ کے ترجمان ڈاکٹر وسیم بیگ کے مطابق زخمی ہونے والے متعدد افراد کو سول ہسپتال ٹراما سینٹر منتقل کیا گیا، جبکہ ایک زخمی بچے کو کمبائنڈ ملٹری ہسپتال (سی ایم ایچ) منتقل کیا گیا۔

ریلوے کوئٹہ ڈویژن کے پبلک ریلیشنز آفیسر محمد کاشف نے بتایا کہ دھماکا خیز مواد کے استعمال سے اسپیزنٹ میں ریلوے ٹریک کو نقصان پہنچا، جس کے سبب جعفر ایکسپریس کی متعدد بوگیاں پٹڑی سے اتر گئیں۔ ان کا کہنا تھا کہ ٹرین میں 270 مسافر سوار تھے، جن میں سے بیشتر محفوظ رہے۔

دھماکے کے فوری بعد امدادی کارروائیاں شروع کی گئیں، ریلیف ٹرین کوئٹہ سے روانہ کر دی گئی اور ریسکیو ٹیمیں، آفیسرز اور پرائیویٹ کرینیں موقع پر پہنچا دی گئیں۔

ریلوے حکام کے مطابق ٹریک کی مرمت اور بوگیوں کو ہٹانے کا کام دن کی روشنی میں شروع کیا جائے گا، جبکہ واقعے کی تحقیقات جاری ہیں۔ سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

دوسری جانب کالعدم بلوچ ریپبلکن گارڈز نے حملے کی ذمہ داری ققبول کرلی۔

بلوچ ریپبلکن گارڈز کے ترجمان دوستین بلوچ نے میڈیا کو جاری کردہ بیان میں کہا ہے کہ بلوچ عسکریت پسندوں نے آج شام کے وقت کوئٹہ سے متصل مستونگ کے علاقے دشت میں ایک آئی ای ڈی نصب کر کے جعفر ایکسپریس کو ریموٹ کنٹرول دھماکے میں نشانہ بنایا۔ دھماکے کے نتیجے میں ٹرین پر سوار پاکستانی فوج کے متعدد اہلکار ہلاک و زخمی ہوگئے، جبکہ ٹرین کی پانچ بوگیاں پٹڑی سے اتر کر الٹ گئیں۔

واضح رہے کہ گزشتہ چند برسوں میں بلوچستان میں دہشت گرد حملوں میں اضافہ دیکھنے میں آیا ہے، جس میں شدت پسند صوبے کے ٹرانسپورٹ انفراسٹرکچر اور ریلوے ٹریکس کو نشانہ بنا چکے ہیں۔ اسپیزنٹ کے قریب پچھلے ماہ بھی ایک ایسا ہی واقعہ پیش آیا تھا، جس میں جعفر ایکسپریس کی 6 بوگیاں پٹڑی سے اتر گئی تھیں۔

گذشتہ برسوں میں بلوچستان میں جعفر ایکسپریس متعدد خطرناک واقعات سے دوچار رہی ہے۔ 

سبی کے قریب نصب بم کے دھماکے سے ٹرین محفوظ رہی، 24 جولائی کو کوئٹہ۔سبی ریلوے سیکشن میں دھماکے سے بولان میل کی ایک بوگی کو نقصان پہنچا، جبکہ 28 جولائی کو سکھر میں پٹڑی سے اترنے کی ابتدائی وجہ دھماکہ قرار دی گئی، بعد میں وزارت ریلوے نے تکنیکی خرابی کا سبب بتایا۔ جون میں جیکب آباد میں ریموٹ کنٹرول بم سے 4 بوگیاں پٹڑی سے اتر گئیں، مگر کوئی جانی نقصان نہیں ہوا۔

یہ واقعات بلوچستان میں ریلوے سیکشن کی سیکیورٹی اور مسافروں کی حفاظت کے حوالے سے خدشات کو بڑھا رہے ہیں۔