بنوں اور کرک میں پولیس تھانوں پر حملے ناکام، 3 دہشت گرد ہلاک، 4 زخمی

پشاور (نمائندگان ڈیلی اردو) پاکستان کے صوبہ خیبرپختونخوا کے شورش زدہ اضلاع بنوں اور کرک میں پولیس نے دہشت گردوں کے تھانوں پر کیے گئے حملے ناکام بنا دیے۔ جوابی کارروائی کے دوران پولیس نے 3 دہشت گردوں کو ہلاک اور 4 کو زخمی کردیا، جبکہ دہشت گرد اپنی ساتھی لاشوں اور زخمیوں کے ساتھ فرار ہوگئے۔

ڈیلی اردوکے مطابق بنوں میں دہشت گردوں نے پہلے میریان تھانے اور پھر مزنگ چوکی پر حملہ کیا۔ حملے کے دوران درجنوں دہشت گرد بھاری ہتھیاروں سے فائرنگ کرتے رہے، جس کا سلسلہ ایک گھنٹے تک جاری رہا۔ آر پی او بنوں سجاد خان کے مطابق پولیس نے بروقت کارروائی کرتے ہوئے دہشت گردوں کے حملے ناکام بنا دیے، اور حملے میں 3 پولیس اہلکار معمولی زخمی ہوئے۔

ادھر کرک کے گرگری تھانے پر بھی دہشت گردوں نے حملہ کیا، تاہم پولیس نے انہیں تھانے کے قریب آنے سے روک دیا اور فائرنگ کے تبادلے میں دہشت گرد ناکام ہوئے۔

پولیس کی بروقت اور مؤثر کارروائی سے دونوں اضلاع میں امن قائم رکھنے میں کامیابی حاصل ہوئی۔