بنوں: سیکیورٹی فورسز کی کارروائی، ایک دہشتگرد ہلاک، اسلحہ برآمد

بنوں (ڈیلی اردو) خیبرپختونخواہ کے شورش زدہ ضلع بنوں کے علاقے میریان میں پولیس، کاؤنٹر ٹیررازم ڈیپارٹمنٹ اور سیکیورٹی فورسز نے خفیہ اطلاع پر مشترکہ انٹیلی جنس بیسڈ آپریشن کیا، جس کے دوران قانون نافذ کرنے والے اداروں اور مسلح افراد کے درمیان فائرنگ کا تبادلہ ہوا۔

حکام کے مطابق کارروائی کے دوران ایک نامعلوم دہشت گرد ہلاک ہوگیا، جس کی لاش تحویل میں لے کر شناخت کا عمل شروع کردیا گیا ہے۔ ہلاک دہشت گرد سے متعلق مزید معلومات حاصل کرنے کے لیے بھی تحقیقات جاری ہیں۔

کارروائی کے دوران ہلاک دہشت گرد کے قبضے سے ایک کلاشنکوف، تین میگزین اور ایک بندولیر برآمد کیا گیا۔ ذرائع کے مطابق آپریشن کے دوران بعض مشتبہ افراد کو بھی حراست میں لیا گیا ہے، جن سے تفتیش کی جارہی ہے۔

مشترکہ آپریشن کے بعد علاقے میں سرچ اور کلیئرنس کارروائیاں بھی جاری رکھی گئیں تاکہ کسی بھی ممکنہ مشتبہ شخص کی موجودگی کا سراغ لگایا جاسکے اور علاقے کو محفوظ بنایا جا سکے۔