بنوں: سی ٹی ڈی، پولیس اور فوج کا مشترکہ آپریشن، کالعدم تنظیم کا مقامی کمانڈر سمیت 2 دہشتگرد ہلاک

بنوں(ڈیلی اردو) بنوں کے علاقے کرم گڑھی ممد خیل میں محکمہ انسداد دہشتگردی (سی ٹی ڈی)، ضلعی پولیس اور پاک فوج کے مشترکہ انٹیلی جنس بیسڈ آپریشن کے دوران فائرنگ کے تبادلے میں کالعدم اتحاد المجاہدین پاکستان (آئی ایم پی) کا مقامی کمانڈر محب خان عرف سمین سمیت 2 دہشتگرد ہلاک ہوگئے۔

سی ٹی ڈی کے مطابق 13 اکتوبر کو خفیہ اطلاع ملی تھی کہ بنوں کینٹ تھانے کی حدود میں موجود دہشتگرد بڑی کارروائی کی منصوبہ بندی کر رہے ہیں، جس پر سکیورٹی اہلکاروں نے مذکورہ مقام پر کارروائی کی۔ حکام کے مطابق اہلکاروں کے پہنچتے ہی دہشتگردوں نے فائرنگ شروع کردی، جس کا جوابی کارروائی کے ذریعے مقابلہ کیا گیا۔ فائرنگ رکنے کے بعد علاقے کی تلاشی کے دوران 2 دہشتگردوں کی لاشیں ملیں، جن میں سے ایک کی شناخت محب خان عرف سمین کے نام سے ہوئی، جبکہ دوسرے دہشتگرد کی شناخت کا عمل جاری ہے۔

سی ٹی ڈی کے مطابق محب خان کے خلاف بنوں میں محکمہ انسداد دہشتگردی کے پاس 22 مقدمات درج تھے۔ اسے پولیس اور سکیورٹی اہلکاروں کی ٹارگٹ کلنگ، دھماکوں، اغوا، املاک کو نقصان پہنچانے اور مختلف مقامات پر غیرقانونی ناکے قائم کرنے سمیت متعدد دہشتگرد کارروائیوں میں ملوث قرار دیا گیا ہے۔ حکام کے مطابق ہلاک دہشتگرد کالعدم تنظیم کے ایک کمانڈر زر گل عرف انکل کا بھتیجا بھی تھا۔