بنوں سے اغواء ہونے والے واپڈا اہلکاروں کی ویڈیو جاری، مغویوں نے حکومت سے بازیابی کی اپیل کردی

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں تھانہ کینٹ کی حدود سے اغواء کیے گئے واپڈا کے پانچ ملازمین کی ویڈیو نامعلوم مقام سے جاری کردی گئی ہے، جس میں مغویوں نے اپنی جان کو خطرہ لاحق قرار دیتے ہوئے حکومت سے فوری اقدامات اٹھانے کی اپیل کی ہے۔

ویڈیو میں مغوی اسسٹنٹ لائن مین نقیب الرحمن نے کہا کہ “ہماری جان کو خطرہ ہے، حکومت ہماری بازیابی کے لیے اقدامات اٹھائے۔ ہمیں نامعلوم مقام پر منتقل کر دیا گیا ہے اور ہم پر بہت سختیاں ڈالی جا رہی ہیں۔ اب ہمیں مارنے کا پروگرام بنایا جا رہا ہے اور ہمیں سخت سزائیں دی جا رہی ہیں۔”

مغوی اہلکاروں نے مزید کہا کہ وہ حکومت اور حکام بالا سے اپیل کرتے ہیں کہ انہیں اغواء کاروں کے قبضے سے بازیاب کرایا جائے۔

یاد رہے کہ چار روز قبل تھانہ کینٹ کی حدود علاقہ پیر دل خیل سے واپڈا ٹیم بجلی کی مرمت میں مصروف تھی کہ اسی دوران کالعدم تحریک طالبان پاکستان (ٹی ٹی پی) کے مسلح افراد نے حملہ کر کے پانچ اہلکاروں کو ڈرائیور سمیت اغواء کرلیا تھا۔

ذرائع کے مطابق مغویوں کی شناخت ڈرائیور عدنان، نقیب الرحمن، فرہاد، عبدالوہاب اور جاویداللہ کے ناموں سے ہوئی ہے۔