بنوں سے ایف سی اہلکار اغوا، عسکریت پسندوں کا ڈرون حملہ ناکام

بنوں (نمائندگان ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں دہشتگردی کے دو علیحدہ واقعات پیش آئے۔ ایک جانب نامعلوم افراد نے ریٹائرڈ ایف سی اہلکار کو ان کے گھر سے اغوا کر لیا، تو دوسری طرف عسکریت پسندوں نے ایف سی چیک پوسٹ پر کواڈ کاپٹر ڈرون حملہ کیا جسے فورسز نے ناکام بنا دیا۔

 ایف سی حوالدار کا اغوا

تفصیلات کے مطابق تحصیل میریان کے علاقے ہوید میں گزشتہ رات نامعلوم مسلح افراد نے ریٹائرڈ ایف سی حوالدار قیصر خان ولد جبر خان کو ان کے گھر سے اغوا کر لیا۔

 ذرائع کا کہنا ہے کہ حملہ آور رات کی تاریکی میں گھر میں داخل ہوئے اور قیصر خان کو زبردستی اپنے ساتھ لے گئے۔ کارروائی کے دوران ملزمان گھر سے دو پستول اور ایک کلاشنکوف بھی ساتھ لے گئے۔

مغوی قیصر خان فرنٹیئر کور بلوچستان سے ریٹائرڈ تھے اور علاقے کی ایک معزز شخصیت سمجھے جاتے تھے۔ واقعے کے فوراً بعد اہلِ خانہ نے پولیس کو اطلاع دی تاہم تاحال مغوی کی بازیابی یا ملزمان کے حوالے سے کوئی پیشرفت سامنے نہیں آئی۔ 

اس واقعے کے بعد علاقے میں خوف و ہراس کی فضا پھیل گئی ہے جبکہ مقامی افراد نے حکومت اور فورسز سے مطالبہ کیا ہے کہ مغوی کو بحفاظت بازیاب کرایا جائے اور اغواکاروں کو قانون کے کٹہرے میں لایا جائے۔

پولیس حکام کا کہنا ہے کہ واقعے کی تحقیقات مختلف پہلوؤں سے کی جا رہی ہیں اور قریبی علاقوں کی نگرانی سخت کر دی گئی ہے۔

فورسز کی چیک پوسٹ پر ڈرون حملہ ناکام

دوسری جانب ضلع بنوں کے علاقے تختی خیل بکاخیل میں عسکریت پسندوں نے ایف سی کی ایک چیک پوسٹ پر کواڈ کاپٹر ڈرون کے ذریعے حملہ کرنے کی کوشش کی۔ تاہم سکیورٹی اہلکاروں نے بروقت جوابی کارروائی کرتے ہوئے ڈرون کو مار گرایا۔