بنوں: فٹ بال گراؤنڈ پر کواڈ کاپٹر ڈرون حملہ، بچوں سمیت 7 افراد زخمی

بنوں (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع بنوں میں تھانہ ہوید کی حدود میں واقع شیخ لنڈک فٹ بال گراؤنڈ پر کواڈ کاپٹر ڈرون کے ذریعے حملہ کیا گیا، جسے پولیس نے دہشت گردانہ کارروائی قرار دیا ہے۔

پولیس کے مطابق کواڈ کاپٹر سے گرنے والا بم زور دار دھماکے سے پھٹ گیا، جس کے نتیجے میں سات افراد زخمی ہو گئے، جن میں کم عمر بچے بھی شامل ہیں۔ زخمیوں کو فوری طور پر قریبی ہسپتال منتقل کر دیا گیا، جہاں بعض کی حالت تشویشناک بتائی جا رہی ہے۔

پولیس حکام کا کہنا ہے کہ ابتدائی تحقیقات کے مطابق فٹ بال گراؤنڈ پر کواڈ کاپٹر ڈرون حملہ دہشت گردوں کی کارروائی ہے، جبکہ واقعے کی مزید تفتیش جاری ہے۔

ادھر بنوں میں دہشت گردی کے واقعات میں اضافے کے دوران ایک اور واقعے میں ترنگ قبرستان کے قریب پولیس اہلکار ضیاء اللہ کو نامعلوم موٹر سائیکل سواروں نے فائرنگ کر کے زخمی کر دیا۔

واقعے کے بعد حملہ آور فرار ہو گئے، جبکہ علاقے میں خوف و ہراس پھیل گیا۔

پولیس نے دونوں واقعات کے بعد علاقے میں سرچ آپریشن شروع کر دیا ہے اور سیکیورٹی مزید سخت کر دی گئی ہے۔