بنوں میں پولیس پر خودکش حملہ ناکام، باجوڑ میں بارودی گاڑی تباہ

بنوں + خار (نمائندگان ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں پولیس نے بڑی تباہی کا منصوبہ ناکام بناتے ہوئے مزنگہ پولیس چوکی پر حملے کی کوشش کرنے والے خودکش بارودی رکشے کو ہدف تک پہنچنے سے پہلے ہی ناکارہ بنا دیا، جس کے نتیجے میں زور دار دھماکہ ہوا۔

تفصیلات کے مطابق تھانہ ہوید کی حدود میں بارود سے بھرا رکشہ پولیس چیک پوسٹ سے ٹکرانے کی کوشش کر رہا تھا۔ اہلکاروں نے رکشہ کو روکنے کی کوشش کی، تاہم ڈرائیور کے نہ رکنے پر فائرنگ کی گئی، جس کے نتیجے میں رکشہ پھٹ گیا۔ دھماکے کی آواز کئی کلو میٹر دور تک سنی گئی جبکہ خودکش بمبار موقع پر ہلاک ہوگیا۔

پولیس حکام کا کہنا ہے کہ اگر بارود سے بھرا رکشہ چیک پوسٹ سے ٹکرا جاتا تو بڑے جانی و مالی نقصان کا خدشہ تھا۔

ادھر، اتحاد المجاہدین پاکستان نے بنوں حملے کی ذمہ داری قبول کرتے ہوئے دعویٰ کیا ہے کہ خودکش حملہ آور کا تعلق ’’البدر خودکش کیمپ‘‘ سے تھا۔

باجوڑ میں بارود سے بھری گاڑی برآمد

دوسری جانب سیکیورٹی فورسز نے باجوڑ میں کارروائی کرتے ہوئے کالعدم تحریک طالبان پاکستان (ٹی ٹی پی) کی سیکڑوں کلوگرام بارود سے بھری گاڑی پکڑ لی۔

سیکیورٹی ذرائع کے مطابق دہشت گرد گاڑی کو سول آبادی میں دھماکے سے اڑانے کا منصوبہ رکھتے تھے، تاہم فورسز نے کارروائی کرتے ہوئے گاڑی کو بروقت تباہ کر دیا۔

واقعے میں سیکیورٹی فورسز یا عام شہریوں کا کوئی جانی نقصان نہیں ہوا۔ ذرائع کا کہنا ہے کہ یہ بارودی مواد افغانستان سے اسمگلنگ کے سامان کے ساتھ پاکستان لایا جا رہا تھا۔

واضح رہے کہ پاکستان، کالعدم تحریک طالبان پاکستان (ٹی ٹی پی) سے وابستہ عسکریت پسندوں کیلئے ’’خوارج‘‘ کی اصطلاح استعمال کرتا ہے۔