بھارتی مداخلت کے ناقابل تردید شواہد موجود ہیں، فیلڈ مارشل عاصم منیر

کوئٹہ (ڈیلی اردو) پاکستانی فوج کے سربراہ فیلڈ مارشل عاصم منیر نے کہا ہے کہ بھارت کی پراکسی جنگ اب ڈھکی چھپی نہیں رہی، ہمارے پاس بھارتی مداخلت کے ناقابل تردید ثبوت موجود ہیں، جو دشمن ہماری خودمختاری کو چیلنج کرے گا اسے منہ توڑ جواب دیا جائے گا۔

ڈیلی اردو کے مطابق یہ بات انہوں نے وزیراعظم شہباز شریف کے ہمراہ کوئٹہ میں منعقدہ عظیم الشان قبائلی جرگے سے خطاب کرتے ہوئے کہی، جو بلوچستان کی سیکیورٹی صورتحال پر قبائلی قیادت سے مشاورت کے لیے بلایا گیا تھا۔

آرمی چیف نے کہا کہ دشمن کے عزائم کو ہر صورت ناکام بنایا جائے گا، پاک فوج ہر خطرے سے نمٹنے کے لیے مکمل طور پر تیار ہے۔ ان کا کہنا تھا کہ بلوچستان کے امن و استحکام پر کوئی سمجھوتہ نہیں کیا جائے گا کیونکہ پاکستان کا مستقبل بلوچستان کی ترقی سے جڑا ہے۔

وزیراعظم شہباز شریف نے اپنے خطاب میں کہا کہ بھارتی سرپرستی میں سرگرم دہشت گرد بلوچستان کے امن اور ترقیاتی منصوبوں میں رکاوٹ ڈالنے کی کوشش کر رہے ہیں۔ انہوں نے فتنہ الہند جیسے دہشت گرد گروہوں کی مقامی حمایت روکنے پر زور دیا۔

وزیراعظم نے قبائلی عمائدین کے مثبت کردار کو سراہا اور کہا کہ مقامی سطح پر شمولیت اور رابطے انتہائی اہم ہیں تاکہ دہشت گردوں کو عوامی حمایت نہ ملے۔ ان کا کہنا تھا کہ دیرپا امن کے لیے دہشت گردی کے خلاف جنگ کی کامیابی ناگزیر ہے۔ حکومت، افواج، قانون نافذ کرنے والے ادارے اور عوام دہشت گردی کے خلاف متحد ہیں۔

وزیراعظم نے واضح کیا کہ دہشت گردوں، ان کے سہولت کاروں اور مددگاروں کے خلاف فیصلہ کن کارروائی کی جائے گی۔ اس موقع پر قبائلی عمائدین نے حکومت اور افواجِ پاکستان کے ساتھ کھڑے ہونے کے عزم کا اعادہ کیا۔