بھارت: حزب المجاہدین سازش کیس: مرکزی ملزم قمر الزمان کو عمر قید کی سزا

نئی دہلی (ڈیلی اردو/بی بی سی) انڈیا کی وفاقی تحقیقاتی ایجنسی (این آئی اے) کی ایک خصوصی عدالت نے آسام میں حزب المجاہدین سازش کیس کے مرکزی ملزم قمر الزمان کو عمر قید کی سزا سنائی ہے۔

(این آئی اے) کی عدالت نے قمر الزمان کو مختلف دورانیے کی قید کی تین سزائیں سنائی ہیں جن میں سے سب سے طویل سزا عمر قید کی ہے تاہم یہ تمام سزائیں ایک ساتھ شروع ہوں گی۔

اس کے علاوہ عدالت نے ہر جرم میں قمر الزمان پر پانچ ہزار روپے جرمانہ بھی عائد کیا تاہم جرمانہ ادا نہ کرنے پر انھیں تین ماہ مزید قید کاٹنی ہو گی۔

یہ کیس وجائی ضلع کے جمنامخ علاقے میں سنہ 2017 اور 2018 کی ایک سازش سے متعلق تھا، جہاں قمر الزمان نے کالعدم حزب المجاہدین کا مقامی ماڈیول قائم کرنے کی کوشش کی۔

تفتیش کاروں نے بتایا کہ یہ منصوبہ مقامی نوجوانوں کو بھرتی کرنے اور آسام میں دہشت گرد سرگرمیوں کو انجام دینے کے لیے بنایا گیا تھا۔