بھارت کا افغانستان میں اپنا سفارت خانہ دوبارہ کھولنے کا اعلان

نئی دہلی (ڈیلی اردو/بی بی سی) بھارت نے افغانستان کے دارالحکومت کابل میں دوبارہ اپنا سفارت خانہ کھولنے کا اعلان کیا ہے۔

یہ اعلان انڈیا کے وزیرِ خارجہ ایس جے شنکر نے جمعہ کو نئی دہلی میں طالبان حکومت کے وزیرِ خارجہ عامر خان متقی کے ساتھ دو طرفہ ملاقات کے دوران کیا۔

شنکر نے متقی سے کہا کہ ’میں یہ اعلان کرتے ہوئے خوشی محسوس کر رہا ہوں کہ انڈیا کے کابل میں تکنیکی مشن کو انڈیا کے سفارت خانے کے درجے پر ترقی دی جا رہی ہے۔‘

انڈیا نے اگست 2021 میں طالبان کے افغانستان میں اقتدار سنبھالنے کے بعد کابل میں اپنا سفارت خانہ بند کر دیا تھا۔

انڈیا کے وزیرِ خارجہ جے شنکر نے طالبان کے وزیرِ خارجہ سے ملاقات کے دوران کہا کہ ’آپ کا دورہ انڈیا اور افغانستان کے تعلقات کے لیے نہایت اہمیت کا حامل ہے۔ افغانستان کے عوام کے خیر خواہ کے طور پر انڈیا ان کی ترقی میں گہری دلچسپی رکھتا ہے۔ ہم اپنی طویل المدتی شراکت داری کے لیے پرعزم ہیں۔‘

اُن کا مزید کہنا تھا کہ ’پہلگام میں دہشت گرد حملے کے بعد افغانستان کی حمایت کو ہم سراہتے ہیں۔ انڈیا افغانستان کی خودمختاری، علاقائی سالمیت اور آزادی کے لیے پوری طرح پرعزم ہے۔ افغانستان میں کان کنی کے لیے انڈین کمپنیوں کو مدعو کرنا بھی قابلِ تعریف اقدام ہے۔‘

واضح رہے کہ اقوامِ متحدہ کی سلامتی کونسل نے افغانستان میں طالبان حکومت کے وزیرِ خارجہ متقی کو نو اکتوبر سے 16 اکتوبر تک انڈیا کے دورے کی اجازت دی ہے۔ متقی اقوامِ متحدہ کی سلامتی کونسل کی جانب سے جاری کی جانے والی دہشت گردوں کی فہرست میں شامل ہیں۔