تحریک لبیک پاکستان کے کارکنوں کیخلاف دہشتگردی ایکٹ کے تحت کارروائی کا آغاز ہو گیا، وفاقی وزیر

اسلام آباد (ڈیلی اردو) وفاقی وزیر برائے اطلاعات و نشریات فواد چوہدری کا کہنا ہے کہ کالعدم تنظیم تحریک لبیک پاکستان کے درجنوں کارکنوں کے خلاف دہشت گردی ایکٹ کے تحت کارروائی کا آغاز ہورہا ہے۔

وفاقی وزیر برائے اطلاعات و نشریات فواد چوہدری کا کہنا ہے کہ نادرا، سیف سٹی لاہور اور دیگر اداروں پر مشتمل خصوصی سیل قائم کیا گیا ہے جو پولیس پرتشدد میں ملوث لوگوں کی ویڈیوز کے ذریعے نشاندہی کررہا ہے۔

وفاقی وزیر نے کہا کہ اب تک درجنوں لوگ شناخت کر لئے گئے ہیں اوران کے خلاف دہشت گردی ایکٹ کے تحت کارروائی کا آغاز ہو رہا ہے، ضلعی انتظامیہ تمام تقاریر کو بھی مانیٹر کرے گی۔

واضح رہے کہ گزشتہ روز وزارت داخلہ نے وفاقی کابینہ کی منظوری کے بعد انسداد دہشتگردی ایکٹ 1997 کے تحت تحریک لبیک پاکستان کو کالعدم قرار دیتے ہوئے نوٹیفیکیشن جاری کردیا تھا۔