ترک صدر ایردوآن کا کرد افواج کو الٹی میٹم، فوری ہتھیار ڈالنے کا مطالبہ

استنبول (ڈیلی اردو ) ترک صدر رجب طیب ایردوآن نے آج بدھ 21 جنوری کو کہا ہے کہ شام کے شمالی حصے میں کرد افواج کو مزید خونریزی سے بچنے کے لیے فوری طور پر ہتھیار ڈال دینے چاہییں اور اپنی تنظیم کو تحلیل کر دینا چاہیے۔ 

ایردوآن نے یہ بات دمشق حکومت کی طرف سے اس گروپ کے ساتھ جنگ بندی کے معاہدے کے تناظر میں کہی ہے۔ دمشق حکومت نے کرد گروپ کو مرکزی ریاست میں شامل ہونے پر اتفاق کرنے کے لیے چار دن کی مہلت دی ہے۔

شام کی ترک نواز حکومتی افواج نے رواں ہفتے شمال مشرقی شام میں کردوں کی زیر قیادت شامی ڈیموکریٹک فورسز (SDF) سے وسیع علاقے قبضے میں لے لیے ہیں۔ یہ کارروائی شامی صدر احمد الشرع کی ان کوششوں کا حصہ ہے، جس کا مقصد پورے ملک کو مرکزی حکومتی اتھارٹی کے تحت لانا ہے۔

امریکہ نے، جو ایس ڈی ایف کا اہم اتحادی ہے، کہا ہے کہ دمشق میں نئی حکومت کے قیام کے بعد سے اس گروپ کے ساتھ اس کی شراکت داری کی نوعیت بدل گئی ہے اور اس نے کرد جنگجوؤں پر زور دیا ہے کہ وہ شام کے ریاستی ڈھانچے میں شامل ہو جائیں۔

ترکی ایس ڈی ایف کو ایک دہشت گرد تنظیم کے طور پر دیکھتا ہے، جس کے روابط کالعدم کردستان ورکرز پارٹی سے ہیں۔ ترکی گزشتہ کئی مہینوں سے کردستان ورکرز پارٹی کے ساتھ امن عمل میں مصروف ہے اور اس کا کہنا ہے کہ اس گروپ اور اس کے ذیلی اداروں کو لازمی طور پر غیر مسلح ہو کر تحلیل ہو جانا چاہیے۔

پارلیمنٹ میں اپنی اے کے پارٹی کے ارکان سے خطاب کرتے ہوئے ایردوآن نے ایس ڈی ایف اور دمشق کے درمیان منگل کو ہونے والے جنگ بندی کے معاہدے کا خیرمقدم کیا اور امید ظاہر کی کہ اس گروپ کا مکمل انضمام شام میں ایک نئے دور کا آغاز کرے گا۔

ایردوآن کے بقول ہتھیار ڈالنا ہی واحد راستہ ہے اور کسی بھی قسم کی اشتعال انگیزی ’’خودکشی کی کوشش‘‘  ہو گی۔