جرمنی نے 650 افغان شہریوں کی پناہ کی منظوری منسوخ کر دی

برلن (ڈیلی اردو) جرمنی نے پاکستان میں منتظر 640 افغان شہریوں کی پناہ کی منظوری واپس لیتے ہوئے اعلان کیا ہے کہ اب انہیں ملک میں داخل ہونے کی اجازت نہیں دی جائے گی۔ یہ فیصلہ جرمن حکومت کی نئی سخت مہاجرت پالیسیوں کا حصہ ہے، جس کے مطابق ری سیٹلمنٹ پروگراموں کو ’’جہاں تک ممکن ہو‘‘ ختم کیا جا رہا ہے۔

وزارت داخلہ کی ترجمان سونیا کوک نے بتایا کہ جن افغانوں کو پہلے منظوری دی گئی تھی، انہیں آئندہ چند روز میں یہ اطلاع دے دی جائے گی کہ اب ان کی منتقلی میں سیاسی دلچسپی باقی نہیں رہی۔

یہ وہی افراد ہیں، جنہیں طالبان حکومت کے خوف اور ممکنہ انتقامی کارروائیوں کے باعث جرمنی میں انسانی بنیادوں پر تحفظ دینے کا وعدہ کیا گیا تھا۔  

اس طرح پہلی بار ان افغان مقامی ملازمین کا پروگرام بھی متاثر ہوا ہے، جنہوں نے افغانستان میں جرمن وزارتوں کے لیے کام کیا تھا۔ امدادی تنظیم ’’کابل ایئرلفٹ‘‘ کے مطابق 130 افراد کو ای میل کے ذریعے بتایا گیا ہے کہ انہیں اب جرمنی داخلے کی اجازت نہیں ہو گی حالانکہ پہلے انہیں منظوری دی جا چکی تھی۔

جرمن وزیر داخلہ الیگزینڈر ڈوبرنٹ نے ڈی ڈبلیو کو بتایا کہ وہ اس معاملے سے لاعلم تھے تاہم انہوں نے یقین دلایا کہ جہاں قانونی طور پر منظوریاں دی گئی ہیں، حکومت انہیں پورا کرے گی۔ ان کے مطابق تمام درخواست گزاروں کو سکیورٹی چیک سے لازمی گزرنا ہو گا۔

سن 2021 میں طالبان کی واپسی کے بعد سے اب تک جرمنی مقامی عملے کے 4,000 مقامی عملے کے ارکان اور ان کے خاندانوں کے 15,000 افراد کو پناہ دے چکا ہے، مگر پاکستان میں رہنے والے باقی افغان شدید غیر یقینی صورتحال سے دوچار ہیں۔ 

پاکستانی حکام کی جانب سے افغان باشندوں کو طالبان حکومت کے حوالے کرنے کی دھمکیوں نے ان کی پریشانی میں اضافہ کر دیا ہے۔