جموں و کشمیر: کولگام میں جھڑپ؛ دو بھارتی فوجی اور دو عسکریت پسند ہلاک

سری نگر (ڈیلی اردو) بھارت کے زیر انتظام جموں و کشمیر کے ضلع کولگام میں پیر کے روز سکیورٹی فورسز اور عسکریت پسندوں کے درمیان تصادم میں دو بھارتی فوجی اور دو عسکریت پسند ہلاک ہو گئے۔

بھارتی فوج کی چنار کور نے دیر رات تصدیق کی کہ جھڑپ کے دوران اس کے دو اہلکار پربھت گوڑ اور لانس نائیک نریندر سندھو ڈیوٹی کے دوران مارے گئے۔ اس سے قبل صرف عسکریت پسندوں کی ہلاکت کی اطلاع سامنے آئی تھی۔

فوج کے مطابق یہ تصادم جنوبی کشمیر کے علاقے گودر (کولگام) کے جنگلات میں اس وقت شروع ہوا جب عسکریت پسندوں کی موجودگی کی اطلاع پر سرچ آپریشن کیا گیا۔ سکیورٹی فورسز پر فائرنگ کے بعد یہ کارروائی انکاؤنٹر میں بدل گئی۔

فوج نے علاقے میں سرچ آپریشن جاری رکھنے کا اعلان کیا ہے، جبکہ تصادم کے بعد وادی میں کشیدگی میں اضافہ دیکھنے میں آ رہا ہے۔