جنوبی افریقہ: کیپ ٹاؤن میں فائرنگ سے 8 افراد ہلاک

کیپ ٹاؤن (ڈیلی اردو) جنوبی افریقہ کے قانون ساز دارالحکومت کیپ ٹاؤن میں گزشتہ روز ہونیوالے فائرنگ واقعے میں مرنیوالے افراد کی تعداد 8 ہو گئی ہے۔

جنوبی افریقہ کی وزارت پولیس نے جمعرات کے روز بتایا کہ کیپ ٹاؤن بین الاقوامی ایئرپورٹ سے صرف 4 کلومیٹر دورجنوب مغرب میں واقع گوگولیتھو کے علاقہ این وائے 79 روڈ میں نامعلوم مسلح افراد نے فائرنگ کر کے 5 افراد کو ہلاک کردیا اور بعد ازاں ایک گاڑی میں جائے وقوعہ سے فرار ہو گئے جبکہ زخمی ہونیوالے 2 افراد اس وقت ہلاک ہو گئے جب انہیں علاج معالجے کیلئے طبی مرکز لے جایا جا رہا تھا۔

وزارت نے اپنے بیان میں کہا کہ فائرنگ سے زخمی ہونیوالے ایک اور شخص کو ہسپتال منتقل کیا گیا لیکن وہ زخموں کی تاب نہ لاتے ہوئے جان کی بازی ہار گیا۔ اطلاعات کے مطابق یہ واقعہ ایک روایتی تقریب کے دوران پیش آیا ہے۔

بیان میں کہا گیا ہے کہ مغربی کیپ کی صوبائی پولیس نے قاتلوں کی تلاش شروع کر دی ہے اور انہیں ڈھونڈنے کیلئے تمام وسائل بروئے کار لائے جا رہے ہیں۔