جنوبی افریقہ: کیپ ٹاؤن میں فائرنگ کے واقعات، 11 افراد ہلاک، 2 زخمی

کیپ ٹاؤن (ڈیلی اردو) جنوبی افریقہ کے کیپ ٹاؤن میٹروپولیٹن علاقے میں فائرنگ کے تین الگ الگ واقعات میں 11 افراد ہلاک جبکہ 2 زخمی ہوگئے۔

جنوبی افریقی پولیس کے مطابق خایلیتشا، لانگا اور گوگولیٹھو کے علاقوں میں پیش آنے والے واقعات کی تحقیقات شروع کردی گئی ہیں۔

پولیس کے مطابق خایلیتشا کے علاقے لنگلیتھو ویسٹ میں فائرنگ سے 25، 31 اور 35 سالہ تین افراد ہلاک ہوئے۔ لانگا کے علاقے کوالانگا میں ونی منڈیلا اسٹریٹ پر ہونے والی فائرنگ میں چار مرد اور ایک خاتون ہلاک ہوئے۔

گوگولیٹھو کی غیر رسمی بستی بارسلونا میں فائرنگ کے تیسرے واقعے میں دو مرد اور ایک خاتون ہلاک جبکہ دو افراد زخمی ہوئے۔

پولیس نے فائرنگ والے علاقوں سمیت دیگر حساس مقامات پر اضافی اہلکار تعینات کردیئے ہیں۔ مغربی کیپ کے صوبائی پولیس کمشنر لیفٹیننٹ جنرل سیزاخیلے ڈیانٹی کے مطابق حملوں کے محرکات تاحال معلوم نہیں ہوسکے۔

پولیس کمشنر نے ملزمان کی گرفتاری میں مدد دینے والی قابل اعتماد اطلاع فراہم کرنے والے شخص کے لیے ایک لاکھ جنوبی افریقی رینڈ انعام کا اعلان کیا ہے۔ ان کا کہنا تھا کہ صوبے میں گروہی تشدد اور غیر قانونی اسلحے کا استعمال بدستور اہم سکیورٹی چیلنجز ہیں۔