جنوبی اور شمالی وزیرستان میں سکیورٹی خدشات کے باعث کرفیو نافذ

وانا + میرانشاہ (نمائندگان ڈیلی اردو) پاکستان کے قبائلی اضلاع جنوبی وزیرستان اپر اور شمالی وزیرستان میں سکیورٹی وجوہات کی بنیاد پر مختلف اوقات میں کرفیو نافذ کر دیا گیا ہے، جس کے دوران عام نقل و حرکت پر مکمل پابندی عائد رہے گی اور تمام بازار، مارکیٹیں اور شاہراہیں بند رہیں گی۔

جنوبی وزیرستان اپر کی ضلعی انتظامیہ کی جانب سے جاری نوٹیفیکیشن کے مطابق ضلع میں 18 اکتوبر کی صبح 6 بجے سے 19 اکتوبر کی صبح 6 بجے تک مکمل کرفیو نافذ کیا گیا۔ اعلامیہ میں کہا گیا ہے کہ اس دوران ہر قسم کی آمد و رفت پر مکمل پابندی ہوگی جبکہ تمام بازار اور تجارتی مراکز بند رہیں گے۔

انتظامیہ کے مطابق کرفیو کے دوران آسمان منزہ، شیرونگی سپین جماعت، تورو امتیارزہ تا توروام کے راستے عام شہریوں کے لیے بند رہیں گے۔ صرف ایمرجنسی کی صورت میں شہری پولیس یا سکیورٹی فورسز کی اجازت سے، شناختی کارڈ اور متعلقہ کاغذات جمع کروا کر سفر کر سکیں گے۔

اعلامیہ میں شہریوں کو ہدایت کی گئی ہے کہ اگر سکیورٹی فورسز کی گاڑی نظر آئے تو اپنی گاڑی کو کم از کم 100 میٹر کے فاصلے پر سڑک سے نیچے اتار لیں تاکہ کسی ناخوشگوار واقعے سے بچا جا سکے۔

دوسری جانب شمالی وزیرستان میں بھی ضلعی انتظامیہ نے سکیورٹی خدشات کے پیش نظر دو روزہ کرفیو نافذ کرنے کا اعلان کیا ہے۔ ڈپٹی کمشنر کے مطابق کرفیو ہفتہ 18 اکتوبر اور اتوار 19 اکتوبر 2025 کو ضلع بھر میں نافذ رہے گا۔

اعلامیہ میں کہا گیا ہے کہ کرفیو کے دوران ضلع کی تمام مرکزی شاہراہیں عام ٹریفک کے لیے بند رہیں گی، جبکہ شہریوں سے اپیل کی گئی ہے کہ وہ غیر ضروری نقل و حرکت سے گریز کریں اور انتظامیہ کے ساتھ تعاون کریں۔

انتظامیہ کے مطابق کرفیو کا نفاذ سکیورٹی وجوہات اور حالیہ صورتحال کے پیش نظر کیا گیا ہے تاکہ امن و امان برقرار رکھا جا سکے اور کسی بھی ممکنہ ناخوشگوار واقعے سے بچا جا سکے۔