جنوبی وزیرستان، باجوڑ میں جھڑپوں میں 10 سے زائد ہلاکتیں، کرم میں حالت کشیدہ

اسلام آباد (ڈیلی اردو رپورٹ )پاکستان کے شورش زدہ صوبے خیبر پختونخوا کے جنوبی وزیرستان کی تحصیل اعظم ورسک کے علاقے کرمزی سٹاپ پر سیکورٹی فورسز اور کالعدم تحریک طالبان پاکستان کے درمیان شدید فائرنگ کا تبادلہ جاری ہے۔ ابتدائی اطلاعات کے مطابق ایک خودکش بمبار سمیت 10 سے زائد حملہ آور ہلاک ہو چکے ہیں۔

باجوڑ کے تھانہ لوئی ماموند کے علاقے میں پولیس چوکی پر مسلح دہشت گردوں نے حملہ کیا، جس کے نتیجے میں ایلیٹ فورس کا اہلکار شاہ وزیر ہلاک ہوا۔ ڈی پی او وقاص رفیق کے مطابق اہلکار کو سنائپر فائر سے نشانہ بنایا گیا۔ شاہ وزیر کا تعلق لوئر دیر سے تھا۔

باجوڑ کی ضلع انتظامیہ نے پانچ مزید دیہات کو کلیئر قرار دیتے ہوئے سیرئے ملان، سیرئے میاں گان، لنڈئے کلان، بلال مسجد ترخو اور شمشیرگر قلعہ ترخو کے مکینوں کو واپسی کی اجازت دے دی ہے۔

بنوں کے علاقے داڑے پل پولیس چوکی پر بھی شدت پسندوں نے حملہ کیا، جس کے دوران پولیس اہلکار رفیع اللہ شدید زخمی ہوئے۔

دوسری جانب کرم میں ایرانی حمایت یافتہ زینبیون بریگیڈ اور سنی عسکریت پسند گروہ العائشہ بریگیڈ کے درمیان کشیدگی میں اضافہ ہوا ہے۔ گزشتہ ہفتوں کے دوران دونوں گروپوں نے ایک دوسرے کے چار افراد اغوا اور ہلاک کیے ہیں۔

سرکاری حکام کے مطابق دونوں گروپوں کو مقامی انجمن حسینیہ اور انجمن فاروقیہ کی حمایت حاصل ہے، جس سے عللاقے  میں کشیدگی برقرار ہے۔