جنوبی وزیرستان: آرمی چیک پوسٹ پر مبینہ خودکش حملہ، جانی نقصان کی اطلاعات

وانا (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان لوئر میں پاکستان آرمی کی ایک چیک پوسٹ پر مبینہ خودکش حملہ کیا گیا ہے۔

ڈیلی اردو کو موصول ہونے والی اطلاعات کے مطابق ہیڈکوارٹر وانا کے علاقے گنگی خیل میں قائم پاکستان آرمی کی چیک پوسٹ کو خودکش حملے کا نشانہ بنایا گیا۔

پولیس کی ابتدائی رپورٹ کے مطابق حملے میں فوری طور پر کسی جانی نقصان کی تصدیق نہیں ہوئی۔ تاہم مقامی ذرائع کا دعویٰ ہے کہ دھماکے میں کئی افراد ہلاک اور متعدد زخمی ہوئے ہیں، جنہیں مختلف اسپتالوں میں منتقل کرتے ہوئے دیکھا گیا۔

پولیس کے مطابق حملے کے بعد ہونے والی کراس فائرنگ کے دوران ایک شہری زخمی ہوگیا، جسے طبی امداد کے لیے ڈسٹرکٹ ہیڈکوارٹر اسپتال وانا منتقل کردیا گیا۔

پولیس کا کہنا ہے کہ دھماکا انتہائی شدید نوعیت کا تھا، جس کے باعث قریبی گھروں کے دروازے اور کھڑکیوں کے شیشے ٹوٹ گئے اور علاقے میں خوف و ہراس پھیل گیا۔

سرکاری سطح پر حملے میں ہلاکتوں یا زخمیوں کی تعداد کی تصدیق نہیں کی گئی، جبکہ سیکیورٹی فورسز نے علاقے کو گھیرے میں لے کر شواہد اکٹھے کرنے اور مزید تحقیقات کا آغاز کر دیا ہے۔

نوٹ: یہ ابتدائی خبر ہے جس میں تفصیلات شامل کی جا رہی ہیں۔