جنوبی وزیرستان میں سکیورٹی فورسز کا آپریشن، تحریک طالبان پاکستان کا دہشت گرد ہلاک

راولپنڈی (ڈیلی اردو) سیکیورٹی فورسز نے خیبر پختونخوا کے قبائلی ضلع جنوبی وزیرستان میں اہم کارروائی کرتے ہوئے ایک دہشت گرد کو ہلاک کردیا۔

پاکستان فوج کے شعبہ تعلقات عامہ (آئی ایس پی آر) کے مطابق جنوبی وزیرستان کے علاقے لدھا میں سیکیورٹی فورسز اور دہشت گردوں کے درمیان فائرنگ کا تبادلہ ہوا جس کے نتیجے میں ایک دہشت گرد ہلاک ہوگیا۔

آئی ایس پی آر کے مطابق دہشت گرد کی شناخت پیر عرف اسد کے نام سے ہوئی ہے۔ پیر عرف اسد 2006 سے کالعدم تنظیم تحریک طالبان پاکستان (ٹی ٹی پی) کا سرگرم رکن تھا۔ دہشت گرد 2006 میں بیت اللہ محسودگروپ میں شامل ہوا۔

آئی ایس پی آر کے مطابق پیر عرف اسد سکیورٹی فورسز کے خلاف متعدد کارروائیوں میں ملوث رہا۔ دہشت گرد کمانڈر حکیم اللہ محسود کی ہلاکت کے بعد اسد شہریار گروپ میں شامل ہوگیا تھا۔