جنوبی وزیرستان میں سیکیورٹی فورسز کا آپریشن، 2 فوجی اور 8 دہشت گرد ہلاک

راولپنڈی (ک م ) خیبر پختونخوا کے قبائلی ضلع جنوبی وزیرستان کے علاقے زرملان میں خفیہ اطلاع پر کیے گئے آپریشن کے دوران 8 دہشت گرد ہلاک جبکہ دو فوجی بھی ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری اعلامیے میں کہا گیا کہ اتوار کو جنوبی وزیرستان کے علاقے زرملان میں دہشت گردوں کے ساتھ فائرنگ کا تبادلہ ہوا جس میں پاک فوج نے بھرپور کارروائی کرتے ہوئے 8 دہشت گردوں کو ہلاک کردیا جبکہ اس دوران دو فوجی بھی ہلاک ہوگئے۔

آئی ایس پی آر کے مطابق مارے گئے دہشت گردوں سے اسلحہ اور گولہ بارود بھی برآمد ہوا ہے۔

آئی ایس پی آر نے کہا کہ ہلاک ہونے والے دہشت گرد سیکیورٹی فورسز کے خلاف دہشت گردی کی کارروائیوں اور معصوم شہریوں کے قتل میں ملوث تھے۔

آئی ایس پی آر کے مطابق شدید فائرنگ کے تبادلے کے دوران پاراچنار سے تعلق رکھنے والے 25 سالہ لانس نائیک شعیب علی اور لکی مروت سے تعلق رکھنے والے 22 سالہ سپاہی سپاہی رفیع اللہ نے بہادری سے لڑتے ہوئے وطن پر جان نچھاور کردی۔

آئی ایس پی آر نے مزید کہا کہ علاقے سے دیگر دہشت گردوں کا صفایا کرنے کے لیے آپریشن جاری ہے۔

پریس ریلیز میں کہا گیا کہ پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید تقویت فراہم کرتی ہیں۔