جنوبی وزیرستان میں ٹارگٹ کلنگ، مولانا اسماعیل وزیر ہلاک

جنوبی وزیرستان (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع جنوبی وزیرستان میں نامعلوم مسلح دہشت گردوں کی فائرنگ کے نتیجے میں جمعیت علمائے اسلام (ف) سے وابستہ مقامی عالمِ دین مولانا اسماعیل وزیر ہلاک ہو گئے۔

مقامی ذرائع کے مطابق واقعہ جنوبی وزیرستان لوئر کی تحصیل برمل کے علاقے اعظم ورسک فروٹ منڈی کے قریب پیش آیا، جہاں دو موٹرسائیکل سوار حملہ آوروں نے مولانا اسماعیل وزیر پر اندھا دھند فائرنگ کی اور واردات کے بعد فرار ہو گئے۔

ذرائع کا کہنا ہے کہ فائرنگ کے نتیجے میں مولانا اسماعیل وزیر شدید زخمی ہوئے، جنہیں فوری طور پر طبی امداد کے لیے اسپتال منتقل کیا گیا، تاہم وہ زخموں کی تاب نہ لاتے ہوئے ہلاک ہو گئے۔

واقعے کے بعد سکیورٹی اور قانون نافذ کرنے والے اداروں نے علاقے کو گھیرے میں لے کر شواہد اکٹھے کرنے اور حملہ آوروں کی تلاش کے لیے سرچ آپریشن شروع کر دیا ہے۔ حکام کا کہنا ہے کہ واقعے کی مختلف پہلوؤں سے تحقیقات جاری ہیں۔

جنوبی وزیرستان میں حالیہ عرصے کے دوران ٹارگٹ کلنگ اور فائرنگ کے واقعات میں اضافہ دیکھنے میں آیا ہے، جس کے باعث مقامی آبادی میں تشویش پائی جاتی ہے۔ تاحال کسی گروہ نے اس حملے کی ذمہ داری قبول نہیں کی ہے۔