جنوبی وزیرستان میں پولیس اہلکار ہلاک، لکی مروت ڈرون حملے کا مقدمہ درج

پشاور(ڈیلی اردو) خیبر پختونخوا کے دو مختلف علاقوں میں پیش آنے والے واقعات میں ایک پولیس اہلکار ہلاک ہوگیا جبکہ لکی مروت میں ڈورن حملے کے واقعے کی ایف آئی آر درج کرلی گئی ہے۔

جنوبی وزیرستان کے علاقے اعظم ورسک میں دہشتگردوں کی فائرنگ سے تھانہ اعظم ورسک میں تعینات محرر سہیل ہلاک ہوگیا۔ ذرائع کے مطابق سہیل خریداری کے سلسلے میں بازار آیا ہوا تھا کہ حملے کا نشانہ بن گیا۔ واقعے کے بعد علاقے میں خوف و ہراس پھیل گیا اور دکانیں عارضی طور پر بند کردی گئیں۔ پولیس کے مطابق محرر کا تعلق ضلع ڈیرہ اسماعیل خان کے علاقے پنیالہ سے تھا اور وہ تین سال سے اعظم ورسک تھانے میں فرائض انجام دے رہا تھا۔

دوسری جانب، لکی مروت کے علاقے سر بند میں چند روز قبل ہونے والے مبینہ ڈرون حملے کا مقدمہ نامعلوم ملزمان کے خلاف درج کرلیا گیا ہے۔ واقعے میں ایک شہری عزیز اللہ ہلاک جبکہ اس کی والدہ اور بھابھی زخمی ہوئی تھیں۔ ایف آئی آر سعداللہ کی مدعیت میں تھانہ لکی سٹی میں درج کی گئی ہے، جس میں قتل، اقدام قتل اور بارودی مواد کی دفعات شامل کی گئی ہیں۔