جنوبی وزیرستان میں ڈپٹی کمشنر کے قافلے پر شدت پسندوں کی فائرنگ، دو پولیس اہلکار زخمی

وانا  (نمائندہ ڈیلی اردو) پاکستان کے   قبائلی ضلع جنوبی وزیرستان اپر کی تحصیل لدھا میں شدت پسندوں نے ڈپٹی کمشنر عصمت اللہ وزیر کے قافلے پر فائرنگ کر دی، جس کے نتیجے میں دو پولیس اہلکار زخمی ہو گئے۔

پولیس کے مطابق فائرنگ کا واقعہ اُس وقت پیش آیا جب ڈپٹی کمشنر کا قافلہ ٹانک سے لدھا جا رہا تھا۔ لدھا کے علاقے کوٹ اڈانہ کے قریب شدت پسندوں نے گھات لگا کر قافلے کو نشانہ بنایا۔ فائرنگ سے اسسٹنٹ کمشنر فنانس اینڈ پلاننگ کی ڈبل کیبن گاڑی کو گولیاں لگیں، جس کے نتیجے میں محرر اعجاز محسود اور کانسٹیبل گل نواز معمولی زخمی ہوئے۔ دونوں زخمی اہلکاروں کو فوری طور پر ڈسٹرکٹ ہیڈ کوارٹر ہسپتال لدھا منتقل کر دیا گیا۔

ڈپٹی کمشنر عصمت اللہ وزیر اور اے ڈی سی ایف اینڈ پی حملے میں محفوظ رہے، جبکہ قافلے کے دیگر اہلکاروں کو فوری طور پر محفوظ مقام پر منتقل کر دیا گیا۔

واقعے کے بعد پولیس اور سیکیورٹی فورسز کی بھاری نفری موقع پر پہنچ گئی ہے۔ علاقے میں سرچ آپریشن جاری ہے اور شدت پسندوں کی تلاش کی جا رہی ہے۔