حملہ ہوا تو خطے میں امریکی فوجی اڈوں کو نشانہ بنائیں گے، ایران

مسقط (ڈیلی اردو) ایرانی وزیرِ خارجہ عباس عراقچی نے الجزیرہ ٹی وی کو انٹرویو دیتے ہوئے کہا ہے کہ اگر امریکہ ایران پر حملہ کرتا ہے تو تہران کے پاس امریکی سرزمین کو نشانہ بنانے کی صلاحیت نہیں، اس لیے ردعمل میں خطے میں موجود امریکی فوجی اڈوں کو نشانہ بنایا جائے گا۔

عباس عراقچی کے مطابق، ’’بدقسمتی سے امریکی فوجی اڈے خطے کے مختلف ممالک میں موجود ہیں، اور کسی حملے کی صورت میں یہی ہمارے ممکنہ اہداف ہوں گے۔‘‘

انہوں نے کہا کہ فی الحال امریکہ کے ساتھ مذاکرات کے اگلے دور کے لیے کوئی حتمی تاریخ طے نہیں ہوئی، تاہم دونوں فریق اس بات پر متفق ہیں کہ بات چیت جلد از جلد ہونی چاہیے۔

ایرانی وزیرِ خارجہ نے انٹرویو کے کچھ حصے اپنے ٹیلی گرام چینل پر بھی شائع کیے، جہاں انہوں نے لکھا:’’جنگ کے لیے ہماری تیاری اُس 12 روزہ جنگ سے بھی زیادہ ہے، اور اسی طرح سفارت کاری کے لیے ہماری تیاری بھی پہلے سے کہیں زیادہ مضبوط ہے۔ ہم نے سفارت کاری کا راستہ اختیار کیا ہے اور امید کرتے ہیں کہ امریکہ بھی یہی کرے گا۔‘‘

عباس عراقچی نے یہ بیان جون 2025 میں ایران اور اسرائیل کے درمیان ہونے والی 12 روزہ جنگ کے تناظر میں دیا۔

انہوں نے واضح کیا کہ یورینیئم کی افزودگی کو مکمل طور پر بند کرنا ایران کے نزدیک ’’مذاکرات کے دائرے سے باہر‘‘ ہے، تاہم اس بات پر زور دیا کہ ایران میں یورینیئم کی افزودگی صرف پُرامن مقاصد کے لیے ہے۔

عباس عراقچی نے ایک بار پھر کہا کہ ایران کا میزائل پروگرام خالصتاً دفاعی نوعیت کا ہے اور اس پر کسی بھی مرحلے پر بات چیت نہیں کی جائے گی، ’’نہ اب اور نہ مستقبل میں۔‘‘

ادھر توقع کی جا رہی ہے کہ اسرائیلی وزیرِاعظم بنیامین نیتن یاہو آئندہ ہفتے واشنگٹن میں امریکی صدر ڈونلڈ ٹرمپ سے ملاقات کے دوران ایران کے بیلسٹک میزائل پروگرام کا معاملہ اٹھائیں گے۔

یہ بیان ایسے وقت میں سامنے آیا ہے جب ایران سے مذاکرات کرنے والے امریکی سینیئر نمائندے اسٹیو وٹکوف اور جیرڈ کشنر بحیرۂ عرب میں موجود طیارہ بردار بحری جہاز یو ایس ایس ابراہم لنکن کا دورہ کر رہے تھے۔

اسٹیو وٹکوف نے سوشل میڈیا پر کہا کہ طیارہ بردار بحری جہاز اور اس کی ٹاسک فورس ’’ہمیں محفوظ رکھتی ہے اور صدر ٹرمپ کے امن کو طاقت کے ذریعے یقینی بنانے کے پیغام کی عکاسی کرتی ہے۔‘‘

واضح رہے کہ صدر ڈونلڈ ٹرمپ اس سے قبل خبردار کر چکے ہیں کہ ایران یا تو معاہدہ کرے یا اس کے نتائج کے لیے تیار رہے۔