خاران میں ‘بلوچ لبریشن فرنٹ کا بم بنانے کا ماہر ہلاک

کوئٹہ (ڈیلی اردو) صوبہ بلوچستان کے ضلع خاران میں انتہائی اہم اور مطلوب دہشت گرد سرغنہ محمد عصا امین عرف مُلا ابراہیم ہلاک ہوگیا۔

ذرائع کے مطابق خاران میں بلوچ لبریشن فرنٹ کے دو گروپوں میں بھتے اور تاوان کی رقم کے تنازعے پر فائرنگ کا تبادلہ ہوا، جس کے نتیجے میں محمدعصا امین عرف مُلا ابراہیم ہلاک ہوگیا۔

محمد عصا امین عرف مُلا ابراہیم کے سر کی قیمت 40 لاکھ روپے مقرر تھی۔

محمد عصا امین عرف مُلا ابراہیم 2010 میں بلوچ لبریشن فرنٹ میں شامل ہوا اور خاران اور شور پارود کے علاقے میں بطور بی ایل ایف سرغنہ دہشت گردی کی وارداتوں میں شامل رہا۔

دہشت گرد سرغنہ بلوچستان میں ترقیاتی منصوبوں پر کام کرنے والے مزدوروں کو قتل کرنے اور ایرانی کنٹینر پر حملے میں ملوث تھا۔

اس کے علاوہ وہ سیکیورٹی فورسز پر بارودی سرنگ کے حملے اور دہشت گردی کی لا تعداد وارداتوں میں ملوث رہا۔

محمد آسا عرف ملا ابراہیم آئی ای ڈی بنانے کا بھی ماہر تھا۔

دہشت گرد کے خلاف بلوچستان کے مختلف حصوں میں 5 سے زائد مقدمات درج تھے۔

عصا امین عرف مُلا ابراہیم کے انتقال پر پاکستانی میڈیا کی جانب سے آپسی جھگڑے کی خبر پر ڈیلی اردو نے بلوچ آزادی پسند ذرائع سے رابطہ کیا انہوں نے اسے “بے بنیاد” و “دروغ گوہی” قرار دیا۔

کالعدم بلوچ لبریشن فرنٹ نے دعوی کیا ہے کہ عصا امین عرف مُلا ابراہیم شور پارود کے پہاڑوں میں انتقال کرگئے۔

بی ایل ایف کے مطابق عصا امین سکنہ خاران 2008 سے “بلوچ مسلح جہد آزادی” سے منسلک تھے قبل ازیں وہ 2005 سے بلوچ طلباء تنظیم کے ساتھ منسلک تھے۔

بی ایل ایف کے مطابق وہ کافی عرصے سے معدے و دیگر امراض میں مبتلا تھے۔