ہنگو میں شاہ الماس پیر پولیس چوکی پر دہشتگردوں کا حملہ، ایک اہلکار ہلاک، 3 اغوا؛ فورسز نے چوکی کا کنٹرول دوبارہ حاصل کرلیا

ہنگو (ڈیلی اردو) پاکستان کے صوبہ خیبر پختونخوا کے ضلع ہنگو میں شاہ الماس پیر پہاڑی پر قائم پولیس چوکی پر دہشتگردوں کے حملے اور فائرنگ کے تبادلے میں ایک پولیس کانسٹیبل ہلاک ہوگیا، جبکہ حملہ آور تین دیگر اہلکاروں کو اغوا کرکے اپنے ساتھ لے گئے۔ پولیس اور سکیورٹی فورسز نے کارروائی کرتے ہوئے چوکی اور پہاڑی کا کنٹرول دوبارہ حاصل کرلیا ہے، جبکہ مغوی اہلکاروں کی بازیابی کے لیے علاقے میں سرچ اور تعاقبی آپریشن جاری ہے۔

پولیس حکام کے مطابق حملہ اتوار اور پیر کی درمیانی شب شاہ الماس پیر زیارت پولیس چوکی پر کیا گیا۔ واقعے کی اطلاع ملتے ہی پولیس اور سکیورٹی فورسز کی بھاری نفری جائے وقوعہ پر پہنچ گئی، جس کے بعد حملہ آوروں اور اہلکاروں کے درمیان شدید فائرنگ کا تبادلہ ہوا۔ اس دوران کانسٹیبل فیروز علی ہلاک ہوگئے، جبکہ حملہ آور تین پولیس اہلکاروں کو اپنے ساتھ لے جانے میں کامیاب ہوگئے۔

ڈسٹرکٹ پولیس آفیسر ہنگو صلاح الدین کنڈی نے بتایا کہ اغوا کیے گئے اہلکاروں کو سمانہ پہاڑی سلسلے کے علاقے خانانو کوٹ کی جانب لے جایا گیا ہے۔ ان کے مطابق پولیس اور سکیورٹی فورسز نے جوابی کارروائی کے بعد شاہ الماس پیر پہاڑی پر واقع چوکی کا کنٹرول دوبارہ سنبھال لیا اور فرار ہونے والے حملہ آوروں کا تعاقب شروع کردیا ہے۔

دوسری جانب ہلاک ہونے والے کانسٹیبل فیروز علی کی نمازِ جنازہ پولیس لائنز ہنگو میں سرکاری اعزاز کے ساتھ ادا کی گئی، جس میں ڈی پی او صلاح الدین کنڈی، پاک فوج اور پولیس کے اعلیٰ افسران سمیت اہلکاروں نے شرکت کی۔ نمازِ جنازہ کے بعد ان کی میت آبائی گاؤں ابراہیم زئی منتقل کردی گئی۔

ذرائع کے مطابق ایک پولیس اہلکار کی ہلاکت اور تین اہلکاروں کے اغوا کی تصدیق کی ہے۔ اخبار کے مطابق پولیس نے چوکی کا کنٹرول واپس حاصل کرنے کے بعد حملہ آوروں کے خلاف تعاقبی کارروائی شروع کردی تھی۔

بھارتی نشریاتی ادارے آکاشوانی نیوز نے بھی واقعے کی رپورٹ میں بتایا کہ حملے کی ذمہ داری تاحال کسی گروہ نے قبول نہیں کی۔ پولیس حکام کے مطابق علاقے میں سکیورٹی ہائی الرٹ کردی گئی ہے اور مغوی اہلکاروں کی بحفاظت بازیابی کے لیے کارروائیاں جاری ہیں۔