خیبر، لوئر دیر، کرم، اورکزئی اور سوات میں چیک پوسٹوں پر دہشت گردوں کے حملے، دو اہلکار ہلاک، متعدد زخمی

اسلام آباد (ش ح ط) صوبہ خیبر پختونخوا کے چار اضلاع میں پولیس اور ایف سی چیک پوسٹوں پر دہشتگردوں کے حملوں میں دو اہلکار ہلاک جبکہ متعدد اہلکار زخمی ہو گئے۔

پولیس کے مطابق قبائلی ضلع خیبر کی تحصیل جمرود میں سخی پل پولیس پوسٹ پر دہشتگردوں نے حملہ کیا، بھرپور جوابی کارروائی سے دہشتگرد فرار ہو گئے، حملے میں پولیس اہلکار محفوظ رہے۔

پولیس کے مطابق جمرود تحصیل کمپاؤنڈ پر بھی دہشتگردوں نے حملہ کیا، تحصیل کمپاؤنڈ میں حملہ آوروں نے دستی بم پھینکا اور فائرنگ کی، حملے میں کوئی جانی نقصان نہیں ہوا۔

پولیس حکام کا کہنا ہے کہ تحصیل کمپاؤنڈ میں تھانہ جمرود سمیت مختلف سرکاری دفاتر قائم ہے۔

ادھر ضلع لوئر دیر میں بھی جندول میں تھانا معیار کی پولیس چیک پوسٹ پر دہشتگردوں نے ہینڈ گرینیڈ اور دیگر اسلحے سے حملہ کیا، حملے میں ایک ہیڈ کانسٹیبل سیاست خان ہلاک اور دوسرا اہلکار زخمی ہوا گیا۔

ڈیلی اردو کے مطابق قبائلی ضلع کرم کی تحصیل سنٹرل کرم کے علاقے تیندو کے مقام پر پولیس تھانہ مرغان اور ایف سی چیک پوسٹ پر دہشت گردوں کے حملے میں 2 اہلکاروں سمیت 3 افراد افراد زخمی زخمی ہوگئے۔

سوات سے نمائندہ ڈیلی اردو کے مطابق تھانہ منگلور کی حدود میں پولیس چوکی تلیگرام پر نامعلوم افراد نے حملہ کیا۔ پولیس کے مطابق ملم جبہ روڈ پر واقع پولیس چوکی تلیگرام پر نمازِ مغرب کے بعد نامعلوم افراد نے فائرنگ کی جس کے بعد پولیس کی جوابی فائرنگ سے ملزمان فرار ہوگئے۔

نمائندہ کے مطابق تلیگرام چوکی کے بعد سمبٹ میں پولیس چیک پوسٹ پر حملہ کیا گیا، جس میں ایک پولیس اہلکار زخمی ہوا ہے۔

پولیس نے ملزمان کی تلاش میں سرچ آپریشن شروع کردیا۔

کلایہ سے نمائندہ ڈیلی اردو کے مطابق قبائلی ضلع اورکزئی میں غلجو ڈگری کالج کے قریب سیکیورٹی فورسز کی کرنچی چیک پوسٹ پر دہشت گردوں کے حملے میں ایوب اللہ نامی اہلکار ہلاک ہوگیا۔