خیبرپختونخوا اسمبلی: گستاخِ صحابہؓ کی گرفتاری کی قرارداد منظور، انٹرپول سے رجوع کرلیا

پشاور (ڈیلی اردو) خیبرپختونخوا اسمبلی نے پاراچنار کے رہائشی ہدایت حسین طوری کے خلاف متفقہ طور پر قرارداد منظور کی ہے، جس میں مطالبہ کیا گیا ہے کہ صحابہ کرامؓ کی گستاخی کے الزام میں ملوث اس شہری کو انٹرپول کے ذریعے گرفتار کر کے پاکستان لایا جائے۔

پولیس نے مقدمہ درج کر کے سعودی حکومت سے باضابطہ رابطہ کر لیا ہے، تاہم خدشہ ظاہر کیا جا رہا ہے کہ ملزم سعودی عرب سے فرار ہو کر کسی قریبی ملک میں پناہ حاصل کر سکتا ہے۔ قانونی ماہرین کے مطابق اگر یہ ثابت ہو گیا کہ گستاخانہ بیانات سعودی عرب سے دیے گئے ہیں تو وہاں ملزم کے خلاف سخت کارروائی ہوسکتی ہے، حتیٰ کہ اسے سر قلم کرنے کی سزا بھی دی جا سکتی ہے۔

دوسری جانب، ضلع کرم میں فعال ٹک ٹاکرز گروپ اہلبیتؑ اور صحابہ کرامؓ کی شان میں گستاخانہ ویڈیوز جاری کر رہے ہیں، جس سے علاقے میں فرقہ وارانہ کشیدگی خطرناک حد تک بڑھ گئی ہے۔ 

زمینی حقائق کے مطابق یہ گروپ انجمن حسینیہ اور انجمن فاروقیہ کی سرپرستی میں سرگرم ہیں، تاہم ماضی کی طرح ایسے واقعات کے بعد دونوں انجمنوں کی جانب سے محض مذمتی بیانات سامنے آتے ہیں، عملی اقدامات نہیں کیے جاتے۔