خیبرپختونخوا: صوابی اور بنوں میں پولیس پر حملے، ایک دہشتگرد اور ایک پولیس اہلکار ہلاک

پشاور  (ڈیلی اردو)  خیبرپختونخوا کے اضلاع صوابی اور بنوں میں پولیس اور سیکیورٹی فورسز پر حملوں کے متعدد واقعات پیش آئے، جن میں ایک پولیس اہلکار ہلاک، تین زخمی جبکہ ایک دہشتگرد مارا گیا۔ 

ضلع صوابی کے علاقے پرمولی سیرئی میں پولیس اور سی ٹی ڈی کی مشترکہ کارروائی کے دوران ایک مکان کو گھیرے میں لیا گیا جہاں دہشتگرد موجود تھے، اس دوران فائرنگ کے تبادلے میں ایک اہلکار عرفان علی زخمی ہوگیا جسے باچا خان میڈیکل کمپلیکس منتقل کیا گیا، جہاں اس کی حالت خطرے سے باہر بتائی گئی۔ 

اسی کارروائی کے تسلسل میں پولیس پر ایک اور حملے میں دو اہلکار زخمی ہوئے، جس کے بعد صوابی پولیس نے جوابی کارروائی کرتے ہوئے کالعدم تنظیم نور تاج گروپ سے تعلق رکھنے والے مطلوب دہشتگرد سعید علی سواتی کو ہلاک کر دیا، جو پہلے بھی ایک پولیس اہلکار کی ہلاکت میں ملوث تھا۔ 

ادھر بنوں میں سی پیک روڈ گل بہار چوک پر نامعلوم افراد کی فائرنگ سے پولیس اہلکار حیات اللہ خان ہلاک ہوگیا، جو ایس پی رورل کے ساتھ بطور سٹینو ڈیوٹی انجام دے رہا تھا، جبکہ اسی روز مزانگہ پولیس چوکی پر بھی نامعلوم مسلح افراد نے حملہ کیا تاہم پولیس کی بروقت جوابی فائرنگ سے حملہ پسپا ہوگیا اور حملہ آور فرار ہو گئے۔