خیبرپختونخوا میں دہشت گردی کے 80 فیصد واقعات، ترجمان پاکستان آرمی کا صوبائی حکومت پر تنقیدی حملہ

اسلام آباد (ڈیلی اردو) پاکستانی فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف چوہدری نے منگل کو پریس کانفرنس میں کہا ہے کہ دہشت گردی کے 80 فیصد واقعات خیبرپختونخوا میں ہوئے، کیونکہ وہاں دہشت گردوں کو سازگار ماحول فراہم کیا جاتا ہے۔

ڈی جی آئی ایس پی آر نے پریس کانفرنس کے دوران خیبرپختونخوا حکومت کے وزرا کے کئی ویڈیو کلپس بھی دکھائے، جن میں صوبے کے وزیر اعلیٰ سمیت دیگر وزرا مختلف علاقوں میں فوجی آپریشن کی مخالفت کرتے نظر آئے۔ انہوں نے کہا، “آپریشن نہیں کرنا تو کیا دہشت گردوں کے پیروں میں بیٹھنا ہے۔”

لیفٹیننٹ جنرل احمد شریف چوہدری نے صوبائی حکومت پر تنقید کرتے ہوئے کہا کہ اسمبلی میں بیٹھ کر جھوٹا بیانیہ بنایا جاتا ہے اور صوبے کے عوام کو دہشت گردوں کے حوالے نہیں کیا جا سکتا۔

انہوں نے پی ٹی آئی کے سربراہ عمران خان کی ایک ٹویٹ کا سکرین شاٹ بھی شیئر کیا اور کہا کہ دیگر سیاسی جماعتیں دہشت گردی کے خلاف کھڑی ہوئیں اور سینوں پر گولیاں بھی کھائیں، لیکن پی ٹی آئی کے رہنما یہ دعویٰ کر رہے ہیں کہ وہ مرنے کو تیار نہیں اور دہشت گردوں کے خلاف نہیں کھڑے ہوں گے۔

ڈی جی آئی ایس پی آر نے سوال اٹھایا کہ دہشت گردوں نے دیگر سیاسی جماعتوں پر حملے کیے، لیکن پی ٹی آئی پر کیوں نہیں، اور کہا کہ ہر سیاسی جماعت کے عمائدین اور رہنماؤں پر حملے ہوئے، چاہے وہ اے این پی، جے یو آئی، پیپلز پارٹی یا نون لیگ ہو۔